پاکستان پیپلزپارٹی نے پاکستان تحریک انصاف پر پابندی سے متعلق وفاقی حکومت کے اعلان کردہ فیصلے کی مخالفت کردی۔

ذرائع کے مطابق پیپلزپارٹی کے سینئر رہنماوں نے اپنی قیادت کو کھل کر حکومت کے فیصلے کی مخالفت کرنے کی تجویز دیتے ہوئے کہا کہ وہ حکومت کے فیصلے کی حمایت نہیں کرتے۔

پارٹی کے بعض رہنماؤں نے عطا تارڑ کے اتحادیوں کو اعتماد میں لینے سے متعلق بیان پر تعجب کا اظہار کیا، ان کا کہنا تھا کہ  جماعت کو اعتماد میں لینے کے حوالے سے انہیں علم نہیں ہے۔

پیپلزپارٹی کے سینیئر رہنما فرحت اللہ بابر نے کھل کرتحریک انصاف پر پابندی کی مخالفت کردی، انہوں نے کہا کہ پی ٹی آئی پر پابندی اور آرٹیکل 6 کے کیس کی باتیں فضول ہیں۔

پیپلزپارٹی کے سینئیر رہنما خورشید شاہ نے صحافیوں سے گفتگو کرتے ہوئے کہا کہ ہمیں اعتماد میں نہیں لیا گیا، آپ کی طرح ہم نے بھی یہ بات سنی ہے، ہمیں سیاست کرنی چاہئے ان چیزوں سے مسئلے حل نہیں ہوں گے۔

انہوں نے کہا کہ جو ملک کے حالات چل رہے ہیں سب کو ملکر بیٹھنا چاہئے، پی ٹی آئی پر پابندی سے متعلق پارٹی پالیسی آنے تک رائے نہیں دے سکتا، میں پارٹی کی پالیسی کے ساتھ کھڑا ہوں، پیپلزپارٹی کی رائے میری رائے ہے، میری ذاتی رائے کوئی نہیں، پارٹی کی طرف سے ابھی کوئی ڈائریکشن نہیں ہے۔

خورشید شاہ کا مزید کہنا تھا کہ عارف علوی، قاسم سوری اور بانی پی ٹی آئی نے جو کیا وہ آئین کی خلاف ورزی تھی،  ان کے خلاف آئین کی خلاف ورزی کا فیصلہ عدالت کرے گی، اب یہ عدالتوں کے فیصلے ہیں دیکھیں عدالت کیا فیصلہ کرتی ہے۔

ذرائع نے بتایا ہے کہ پیپلزپارٹی کے سنیئر رہنماوں نے پارٹی قیادت سے رابطے کا فیصلہ کیا ہے، پارٹی رہنما پی پی قیادت سے حکومتی اعلان کی تصدیق لیں گے۔

ذرائع نے بتایا کہ پارٹی قیادت سے رابطہ نہ ہونے پرجماعت شدید کنفیوژن کا شکار ہے، پی پی قیادت سے موجودہ صورتحال پر پالیسی گائیڈ لائنز لی جائیں گی، عطا تارڑ کی پریس کانفرنس پر پارٹی رہنماوں کے باہمی رابطے ہوئے۔

پارٹی ذرائع کا کہنا تھا کہ پیپلزپارٹی کو تحریک انصاف پر پابندی کے اعلان کی توقع نہیں تھی، ن لیگ نے پی ٹی آئی پر پابندی کا اعلان کر کے غلط سیاسی چال کھیلی ہے ن لیگی قیادت مشکل سیاسی حالات میں اعصاب کی جنگ ہار رہی ہے۔

یاد رہے کہ چیئرمین پیپلزپارٹی بلاول بھٹو گذشتہ ہفتے سے غیرملکی دورے پر ہیں، وہ اس وقت امریکا میں موجود ہیں۔