حماس کے سیاسی ونگ کے سربراہ اسماعیل ہنیہ تہران میں قاتلانہ حملے میں شہید ہوگئے۔

بین الاقوامی خبررساں ادارے کے مطابق حماس اور ایرانی پاسداران انقلاب نے اسماعیل ہنیہ کے تہران میں شہید ہونے کی تصدیق کی ہے ۔

حملے میں اسماعیل ہنیہ کا ایک محافظ بھی شہید ہوا ہے۔

اسماعیل ہنیہ ایرانی صدر کی تقریب حلف برادری میں شرکت  کے لیے تہران گئے تھے۔

حماس کے سربراہ اور ان کے محافظ کو تہران میں ان کی رہائش گاہ کو نشانہ بناکرشہید کیا گیا۔

حماس کی جانب سے تصدیقی اعلان میں کہا گیا کہ حماس فلسطینی عوام اور عرب قوم کے لیے دکھ کے ساتھ اعلان کرتی ہے کہ حماس کے سیاسی بیورو کے سربراہ اسماعیل ہنیہ نئے ایرانی صدر کی تقریب میں شرکت کے بعد تہران میں  اسرائیلی حملے میں مارے گئے۔

حملے کی تحقیقات جاری ہیں اور نتائج کا اعلان جلد  کیا جائے گا۔

فوری طور پر کسی نے اس حملے کی ذمہ داری قبول نہیں کی، لیکن اسرائیل نے 7 اکتوبر کو حماس کے اسرائیل پر حملے کے بعد اسماعیل ہنیہ اور حماس کے دیگر رہنماؤں کو قتل کرنے کا عزم ظاہر کیا تھا۔

دوسری جانب اسرائیلی میڈیا کا کہنا ہےکہ اسرائیلی وقت کے مطابق رات تقریباً 2 بجے تہران کے قلب میں ایک میزائل فائرکیا گیا جہاں اسماعیل ہنیہ اپنے محافظ سمیت موجود تھے۔

واضح رہے کہ غزہ جنگ کے دوران اسرائیلی حملے میں اسماعیل ہنیہ کے تین بیٹے اور4 پوتے  بھی شہید ہوچکے ہیں۔