کراچی: اعلیٰ ثانوی بورڈ نے نظام کو جدید تقاضوں سے استوار کرکے انٹربورڈ آفس میں سہولت مرکز قائم کردیا۔

اعلیٰ ثانوی بورڈ کراچی میں سہولت مرکز کا باقاعدہ افتتاح صوبائی وزیر یونیورسٹیز اینڈ بورڈز محمد علی ملکانی نے کیا جب کہ اس اقدام سے مختلف فارم یا کاغذات سے طلبہ کو نجات مل گئی ہے۔

چیئرمین انٹربورڈ سید ذوالفقار علی شاہ کہتے ہیں کہ امیدوار اب صرف ایک فارم پُر کریں گے اور تمام مطلوبہ دستاویزات حاصل کرسکیں گے، کراچی انٹرمیڈیٹ بورڈ کو مکمل پیپر لیس کرنے کے لئے بورڈ آفس میں فیسلیٹیشن سینٹر قائم کیا گیا ہے۔

چیئرمین انٹربورڈ نے کہا کہ انٹربورڈ آفس میں لمبی لائنوں سے طلبہ کی جان چھوٹ گئی ہے جب کہ صوبائی وزیر یونیورسٹیز اینڈ بورڈز محمد علی ملکانی کی ہدایت پر نقل کی روک تھام کے لئے کوسچن آئٹم ڈیویلپمنٹ پروجیکٹ پر بھی کام شروع ہوگیا ہے۔

سید ذوالفقار علی شاہ نے بتایا کہ نئے سیشن کے آغاز سے اساتذہ اور طلبہ کو ای مارکنگ اور او ایم آر کے حوالے سے پریکٹس کروائیں گے، اگلے سالانہ امتحان میں ہم ای مارکنگ اور او ایم آر کو عمل درآمد کرا سکیں گے۔

چیئرمین انٹربورڈ کا کہنا تھا کہ کام کی رفتار تیز کرنے کے لئے رواں سال کے سالانہ امتحانات برائے 2024 کے نتائج کے لئے چھ اسسمنٹ سینٹرز قائم ہیں۔

سید ذوالفقار علی شاہ نے مزید کہا کہ رواں سال 2024 کے انٹربورڈ کے سالانہ امتحانات کے نتائج کا اعلان اگست کا مہینہ گزرنے سے قبل ہوجائے گا۔