عمرایوب نے کہا ہے کہ مخصوص نشستوں سے متعلق ارکان کے حلف نامے نشانہ تھا، چھاپہ بہانا تھا۔ تمام ارکان پر دہشتگردی کے مقدمے بنائے گئے ہیں۔

اسلام آباد میں اپوزیشن لیڈر قومی اسمبلی عمر ایوب نے دیگر پاکستان تحریک انصاف کے رہنماؤں کے ہمراہ پریس کانفرنس کرتے ہوئے کہا کہ ان کو سپریم کورٹ کا فیصلہ ہضم نہیں ہورہا، ہم محب وطن لوگ ہیں، مخصوص نشستوں سے متعلق ارکان کے حلف نامے نشانہ تھا، چھاپہ بہاناتھا۔

عمرایوب نے کہا کہ سیاسی استحکام نہیں ہوگا توملک میں معاشی استحکام نہیں ہوگا، روز پریس کانفرنسزہوتی ہیں کہ پی ٹی آئی کو کیوں نشستیں دی گئیں، ہمارے خلاف غداری کے مقدمے بنائے جا رہے ہیں۔ تقریباً تمام ارکان پر دہشتگردی کے مقدمے بنائے گئے ہیں۔

اپوزیشن لیڈرقومی اسمبلی نے کہا کہ کوئی ہم پرغداری کا لیبل نہیں لگا سکتا، گندم اسکینڈل پرتحقیقاتی کمیشن بنائیں اورانکوائری کریں، پٹرول اور سگریٹ اسمگلنگ کی بھی تحقیقات ہونی چاہئیں، نان کسٹم پیڈ گاڑیوں کی بھی تحقیقات ہونی چاہئے۔

عمرایوب نے کہا کہ 5 ارب کی پٹرولیم مصنوعات ایران سے پاکستان اسمگل ہوتی ہیں، پٹرولیم مصنوعات کیوں اور کیسے اسمگل ہورہی ہیں؟ جہاں اظہاررائے کی آزادی نہیں وہاں حالات ٹھیک نہیں ہوسکتے۔

بیرسٹرگوہرنے کہا کہ رؤف حسن کو گرفتار کیا گیا ان کی عمر70 سال ہے، رؤف حسن کینسرکے مریض ہیں، بتایا گیا رؤف حسن کے خلاف کوئی مقدمہ نہیں ہے، مجھے گرفتارنہیں کیا گیا تھا، رؤف حسن کے ساتھ گیا تھا۔

چیئرمین پی ٹی آئی نے کہا کہ ہمارے ساتھیوں کو اٹھایا جاتا رہا کچھ کا آج تک پتا نہیں، پی ٹی آئی دہشتگردی کی ہر قسم کی مذمت کرتی ہے، چھاپے میں تما م ریکارڈ قبضے میں لے لیا گیا، رؤف حسن کی رہائی کےلیے قانونی جنگ لڑیں گے، جو آپریشن ہونے جارہا ہے اس پر ایوان کو اعتماد میں لیا جائے۔

بیرسٹر گوہرنے مزید کہا کہ وزیردفاع نے کہا ایوان میں بریفنگ ہوگی، وزیراعظم موجودہونگے، آپریشن سے متعلق کوئی بریفنگ نہیں ہوئی، امید ہے کل رؤف حسن کو بازیاب کیا جائے گا۔