لاہور: لیگی رہنما طلال چوہدری کا پی ٹی آئی کی علامتی بھوک ہڑتال پر کہنا ہے کہ چار گھنٹے کی ہڑتال نہیں چڑی روزہ ہوتا ہے۔

پی ٹی آئی کی علامتی بھوک ہڑتال پر مسلم لیگ (ن) کے رہنما طلال چوہدری کا بیان سامنے آگیا ہے جس میں انہوں نے کہا کہ پی ٹی آئی کی علامتی بھوک ہڑتال محض ڈرامہ بازی ہے،  چار گھنٹے کی ہڑتال نہیں چڑی روزہ ہوتا ہے۔

طلال چوہدری کا کہنا تھا کہ دوپہر کے کھانے کے بعد اور شام کی چائے سے پہلے کون سی بھوک ہڑتال ہوتی ہے؟، جس کے لئے یہ بھوک ہڑتال کر رہے ہیں وہ جیل میں کاجو، بادام اور دیسی مرغ کھا رہا ہے۔

طلال چوہدری کا کہنا ہے کہ ان فراڈیوں اور بہروپیوں کا کام فوٹو سیشن اور پارٹ ٹائم انقلاب ہے، ہڑتال کرنا ان کا آئینی حق ہے لیکن صرف 4 گھنٹے کی بھوک ہڑتال وہ بھی لنچ کے بعد۔

ان کا یہ بھی کہنا تھا کہ پی ٹی آئی کے ان رہنماﺅں کو عمران خان کے اعترافی بیان پر بھوک ہڑتال کرنی چاہیے، انہیں عمران نیازی کے 9 مئی واقعہ کا اعترافی بیان دینے کے بعد پولی گرافک ٹیسٹ سے انکار اور عمران نیازی کے دوغلے پن پر بھی بھوک ہڑتال کرنی چاہیے۔

لیگی رہنما کہتے ہیں کہ تحریک انتشار کے سرغنہ کا اعترافی بیان 9 مئی کے واقعات کا اقبال جرم ہے، عمران نیازی کی بہنیں اور بھانجے کور کمانڈر کے باہر موجود تھے جو لوگوں کو ٹارگٹ پر پہنچنے کی ہدایات دیتے رہے۔

طلال چوہدری نے مزید کہا کہ تحریک انصاف نے ہمیشہ پاکستان کو کمزور کرنے کی سازش کی، یہ کبھی بھوک ہڑتال اور کبھی پاکستان کو بند کرنے کی سازش کرتے ہیں۔

انہوں نے مزید کہا کہ بانی پی ٹی آئی کے ماضی کے ناقد محمود اچکزئی بھوک ہڑتالی کیمپ میں نوکری کی تلاش میں ہیں، یہ جتنا مرضی ہڑتالیں کرلیں، ان کے ہاتھ کچھ نہیں آنے والا جب کہ تحریک انتشار کا جمعہ کو بھی فلاپ شو ہوگا۔