جماعت اسلامی کے امیر حافظ نعیم الرحمان کا کہنا ہے کہ ہو سکتا ہے کل دھرنے کے بعد مارچ شروع کر دیں۔

راولپنڈی میں جماعت اسلامی کے دھرنے سے خطاب کرتے ہوئے حافظ نعیم الرحمان کا کہنا تھا کہ 70 سے 80 فیصد آئی پی پیز مقامی ہیں، نیت درست ہو تو آئی پی پیز کو قابو کیا جا سکتا ہے۔

انہوں نے کہا کہ جس آئی پی پی نے جعلسازی کی ہو اس کو پکڑیں لیکن حکومت کو صرف اقتدار بچانے کی فکر لگی ہوئی ہے۔

امیر جماعت اسلامی نے کہا کہ پاکستان کے لوگوں کو دھرنے کے شرکا سے امیدیں ہیں، ہمارا دھرنا دو تین دن کا نہیں مہینے کا بھی ہو سکتا ہے۔

حافظ نعیم الرحمان نے کہا کہ حکومت نے چاروں طرف کنٹینرز لگا کر اسلام آباد کو بند کر دیا ہے۔

انہوں نے کہا کہ فساد پیدا کرنے کی سازش کی گئی، فساد کی سازش پر ہم نے امن کو ترجیح دی، فساد کی سازش پر ہم نے امن کو ترجیح دی ہے، ہم فیصلہ لیے بغیر واپس نہیں جائیں گے۔

جماعت اسلامی کے امیر کا کہنا تھا کہ آئی پی پیز کا فارنزک آڈٹ اور پٹرول پر لیوی کو کم کیا جائے، حکومت نے مطالبات تسلیم نہ کیے تودھرنا جاری رہے گا۔

امیر جماعت اسلامی حافظ نعیم الرحمان کا مزید کہنا تھا کہ آٹا، چینی اور بچوں کے دودھ پر لگایا گیا ٹیکس واپس لیں، مذاکرات اور دھرنا ساتھ ساتھ چلیں گے، مری روڈ پر دھرنا تاریخی جلسے میں تبدیل ہو جائے گا، ہوسکتا ہے کل دھرنے کے بعد مارچ شروع کر دیں۔