راولپنڈی: حکومت نے جماعت اسلامی کے گرفتار تمام کارکنوں کو رہا کرنے کا فیصلہ کرلیا۔

وفاقی وزیر اطلاعات عطاء تارڑ کا کہنا ہے کہ حکومت نے 35 ارکان کی فوری رہائی کا حکم دیا ہے، جماعت اسلامی کی فہرست پر فوری رہائی کا اعلان کیا گیا ہے۔

وفاقی وزیر اطلاعات نے کہا کہ اخراجات میں کمی، نجکاری  اور معاشی اصلاحات سےعوام تک ریلیف پہنچے گا، حکومت کے اخراجات کو کم کرنے کی کوشش کی جارہی ہے، جن حالات میں حکومت ملی یہ آسان کام نہیں تھا۔

عطاء تارڑ کا کہنا تھا کہ ٹیکنیکل کمیٹی میں وزیر پانی و بجلی کو شامل کیا گیا ہے، 200 یونٹ والے صارفین کے لیے 50 ارب روپے ترقیاتی فنڈ سے دیےگئے۔

وزیر اطلاعات نے بتایا کہ جماعت اسلامی کے 10 مطالبات ہیں، مطالبات بجلی، زراعت اور ٹیکس سے متعلق ہیں جب کہ ہم نے ملک کو ڈیفالٹ سے بچایا ہے، 2018 میں ہم مہنگائی کو 4 فیصد پر چھوڑ کر گئے تھے۔

عطاء تارڑ کا کہنا تھا کہ روپےکا استحکام حکومت کا سب سے بڑا اقدام ہے، معیشت کو بہتر کرنا حکومت کی اولین ترجیح ہے۔

وفاقی وزیر نے مزید کہا کہ مذاکرات کے اگلے دور میں کوشش ہوگی کہ معاملات خوش اسلوبی سے طے پائیں، کوشش ہوگی انہیں عزت کے ساتھ رخصت کیا جائے۔

وفاقی وزیر انجنیئر امیر مقام کہتے ہیں کہ جو جماعت اسلامی کے مطالبات ہیں ہم بھی وہ چاہتے ہیں، جیب میں 100 روپے ہوں اور 200 کا مطالبہ ہو تو مزید 100 روپے کہاں سے لائیں؟ جماعت اسلامی کا احتجاج ریکارڈ ہوگیا ہے۔

امیر مقام کا کہنا ہے کہ ذرائع آمدن اور اخراجات دیکھ کر فیصلہ کیا جاتا ہے، جومطالبات جماعت اسلامی نے رکھے وہی تمام عمائدین کررہے ہوتے ہیں۔