پیرس اولمپکس 2024: افتتاحی تقریب کے دوران جنوبی کوریا کے کھلاڑیوں کو غلط طور پر شمالی کوریا کے طور پر متعارف کرایا گیا۔

جنوبی کوریا کی وزارت کھیل نے وزارت خارجہ سے کہا ہے کہ وہ اس معاملے پر فرانسیسی فریق سے سخت احتجاج کرے۔

بین الاقوامی اولمپک کمیٹی (آئی او سی) نے پیرس اولمپکس کی افتتاحی تقریب کے دوران جنوبی کوریا کے کھلاڑیوں کو غلط طور پر شمالی کوریا کے طور پر متعارف کرانے کی غلطی پر معافی مانگی ہے۔

واضح رہے کہ افتتاحی تقریب میں جب جنوبی کوریا کا دستہ فرانس کے دارالحکومت میں دریائے سین سے گزررہا تھا تو انہیں شمالی کوریا کے سرکاری نام سے متعارف کرایا گیا۔

جنوبی کوریا کے دستے کے آگے ملک کا نام فرانسیسی میں “ریپبلک پاپولیر ڈیموکریٹک ڈی کورے”، پھر انگریزی میں “ڈیموکریٹک پیپلز ریپبلک آف کوریا لکھا ہوا تھا۔

آئی او سی نے اپنے آفیشل کورین لینگویج ایکس اکاؤنٹ پر ایک پوسٹ میں کہا کہ ہم افتتاحی تقریب کی نشریات کے دوران جنوبی کوریا کی ٹیم کا تعارف کرواتے وقت ہونے والی غلطی پر معذرت خواہ ہیں۔

جنوبی کوریا کی وزارت کھیل نے ایک بیان میں کہا ہے کہ وہ 2024 کے پیرس اولمپکس کی افتتاحی تقریب کے دوران اس اعلان پر افسوس کا اظہار کرتی ہے جہاں جنوبی کوریا کے وفد کو شمالی کوریا کی ٹیم کے طور پر متعارف کرایا گیا تھا۔