سینئر قانون دان اعتزاز احسن کا کہنا ہے کہ لگتا نہیں ہے کہ سپریم کورٹ ریفرنس کوسماعت کے قابل سمجھے گی۔

بول نیوز کے پروگرام ’تجزیہ‘ میں گفتگو کرتے ہوئے پیپلزپارٹی کے رہنما اور سینئر قانون دان اعتزاز احسن نے کہا کہ لگتا نہیں ہے کہ سپریم کورٹ ریفرنس کوسماعت کے قابل سمجھے گی۔

انہوں نے کہا کہ پنجاب سے منتخب کروائے گئے اراکین سے توجہ ہٹانے کے لیے یہ اقدام کیا گیا، حکومت فارم 45 سے توجہ ہٹانے کے لیے یہ سب کچھ کررہی ہے، فارم 45 پر بہت ٹیمپرنگ کی گئی ہے۔

اعتزاز احسن کا کہنا تھا کہ 90 یا 95 ہزار ووٹوں کو5 یا 6 ہزار کیا گیا، ہر خلاف ورزی میں آرٹیکل 6 نہیں لگتا، خلاف ورزیاں بہت ہوتی رہتی ہیں۔

اس سے قبل، نجی ٹی وی سے بات کرتے ہوئے سینئر قانون دان اعتزاز احسن کا کہنا تھا کہ  یہ ایک مذاق ہے، کوئی انہیں مس لیڈ کر رہا ہے، یہ اس لیے کر رہے ہیں کہ اس جماعت کا لیڈر ہر کیس میں بری ہو رہا ہے، ان کو کچھ اور نہیں ملا تو اس طرف چل پڑے۔

اعتزاز احسن نے مزید کہا کہ مسلم لیگ (ن) نے بتایا کہ ابھی ہم اس معاملے پر پیپلز پارٹی سے بات کریں گے تو پیپلز پارٹی ان کو مشورہ دے گی یہ یہ لوگ جال میں پھنس رہے ہیں، اس پریس کانفرنس کی ایک دو دن میں (ن) لیگ کے وزرا تردید کردیں گے، ان کے پاس وکیل تو اچھے ہیں لیکن سمجھ نہیں آرہا ہے کہ ان کو ہوا کیا ہے۔