امریکی ریاست ٹیکساس کے ساحلوں سے ٹکرانے والے خطرناک سمندری طوفان ’بیرل‘ کے باعث امریکی ایئرلائنز کی 1300 سے زائد پروازیں منسوخ کر دی گئیں ہیں۔

امریکہ میں فضائی کمپنیوں نے آج سمندری طوفان بیرل کے شدت اختیار کرنے اور ٹیکساس سے ٹکرانے کے بعد 1300 سے زائد پروازیں منسوخ کر دی ہیں، جبکہ ٹیکساس کی سب سے بڑی بندرگاہوں نے بھی اتوار کے روز بیریل میں شدت کے بعد آپریشن اور بحری جہازوں کی آمدورفت بند کردی۔

فلائٹ ٹریکنگ ویب سائٹ فلائٹ اویئر کے مطابق صبح 8 بج کر 16 منٹ تک کل 1354 پروازیں منسوخ اور 773 پروازیں تاخیر کا شکار ہوئیں۔

ایک نجی ایئرلائنز 405 پروازوں کے ساتھ اس فہرست میں سرفہرست ہے جبکہ دوسری نجی ایئرلائنز 268 کے ساتھ دوسرے نمبر پر ہے۔

نجی ایئرلائنز کے ترجمان نے کہا کہ وہ صورتحال پر نظر رکھے ہوئے ہے اور طوفان کی وجہ سے ہیوسٹن اور جنوبی ٹیکساس میں پیر کو اپنی پروازوں کے شیڈول کو فعال طور پر ایڈجسٹ کیا ہے۔

امریکی کی دو نجی ایئرلائنز نے سمندری طوفان بیرل کا حوالہ دیتے ہوئے ٹریول ایڈوائزری بھی جاری کی جس سے آسٹن، کارپس کرسٹی، ہارلنگن اور ہیوسٹن سمیت خطے کے دیگر ہوائی اڈوں پر پروازیں متاثر ہوئیں۔

امریکہ کے نیشنل ہریکین سینٹر (این ایچ سی) نے کہا ہے کہ سیزن کا سب سے پہلا کیٹیگری 5 سمندری طوفان بیرل ٹیکساس کے ساحلی قصبے ماتاگوردا کے قریب سے ٹکرایا جس کے نتیجے میں خطرناک طوفانی لہریں اٹھیں۔

ٹیکساس کی سب سے بڑی بندرگاہوں نے بھی اتوار کے روز بیریل کی شدت میں اضافے کے بعد آپریشن اور بحری جہازوں کی آمدورفت بند کردی۔

فیڈرل ایوی ایشن ایڈمنسٹریشن (ایف اے اے) نے خبردار کیا ہے کہ ملک بھر میں گرج چمک کے ساتھ سفر متاثر ہو سکتا ہے۔