راولپنڈی: امیرجماعت اسلامی حافظ نعیم الرحمان نے دھرنے میں شرکاء سے خطاب میں کہا کہ خواتین کا جذبہ بتارہا ہے کہ اس تحریک کو روکا نہیں جاسکتا۔

امیر جماعت اسلامی حافظ نعیم الرحمان نے دھرنے کے شرکاء سے خطاب کرتے ہوئے کہا کہ ایک جانب حکومت مذاکرات کی بات کررہی ہے لیکن ہم نے حکومت کو اپنے مطالبات دیے ہیں۔

امیرجماعت اسلامی کا کہنا ہے کہ لاہور میں خواتین کارکنان کے راستے میں رکاوٹ کھڑی کی گئیں اور بسوں کو واپس بھیجا گیا، یہ سب پنجاب حکومت کی فسطائیت ہے، آج یہاں مری روڈ پر تاریخ جلسے پر خواتین کو سلام پیش کرتا ہوں۔

انہوں نے دعویٰ کیا کہ جماعت اسلامی کی یہ تحریک کامیابی سے ہمکنارہوگی، خواتین کا جذبہ بتارہا ہے کہ اس تحریک کو روکا نہیں جاسکتا۔ خواتین بوجھ نہیں ہمارے ماتھے کا جھومر ہیں، خواتین کی وجہ سے ہی تو کائنات میں رنگ ہیں۔

حافظ نعیم الرحمان کہتے ہیں کہ حکومت آئے بیٹھ کر بات کرے، آئی پی پیز کو ختم کریں۔ منشیات فروشی میں حکومت اور پولیس ملوث ہے، پیپلزپارٹی کے بڑے وڈیرے ذمہ دار ہیں اور بلاول بھٹو لاکھوں کا جوتا پہن کر بچوں کے ساتھ تصاویر بنواتے ہیں۔ تعلیم دینا تو ریاست کی ذمہ داری ہے جب کہ پنجاب میں سرکاری اسکولز کو پرائیوٹائز کیا جارہا ہے۔

انہوں نے کہا کہ نوجوان مستقبل سے مایوس ہوجائیں تو اس سے بڑی تباہی کیا ہوگی، انہوں نے نوجوان کو مایوس کردیا ہے، یہ ملک تو نوجوانوں کاملک ہے، تعلیمی اداروں میں نوجوانوں کو نشے کا عادی بنایا جارہا ہے۔

امیر جماعت اسلامی نے مزید کہا کہ تمام دھرنوں کا مرکز مری روڈ ہے جب کہ کراچی میں پرسوں گورنر ہاؤس کے باہر دھرنا شروع ہوگا۔ پشاور کی قیادت کو بھی دھرنے سے متعلق آگاہ کردیا ہے، جب تک مطالبات تسلیم نہیں ہوتے یہ دھرنا جاری رہے گا۔