کراچی: نیو ایم اے جناح روڈ پر حماس رہنما اسماعیل ہنیہ کی غائبانہ نماز جنازہ کے موقع پر بڑی تعداد میں لوگوں کی شرکت۔

کراچی میں نیو ایم اے جناح روڈ پر حماس رہنما اسماعیل ہنیہ کی غائبانہ نماز جنازہ کا اہتمام کیا گیا ہے جس میں شرکت کے لیے لوگوں کی بڑی تعداد پہنچ گئی ہے۔

غائبانہ نماز جنازہ کچھ دیر بعد ادا کی جائے گی، غائبانہ نماز جنازہ میں شریک افراد نے ہاتھوں میں فلسطین کے جھنڈے بھی اٹھا رکھے ہیں۔ غائبانہ نماز جنازہ میں شریک افراد نے اسرائیل کے خلاف سخت نعرے بازی کی۔

حماس سربراہ کی غائبانہ نماز جنازہ میں امیر جماعت اسلامی کراچی منعم ظفر خان نے خطاب کرتے ہوئے کہا کہ آج ہم عظیم شخصیت کی غائبانہ نمازجنازہ ادا کرنے آئے ہیں، اسماعیل ہنیہ قبلہ اول کی آزادی کے لئے جنگ لڑرہے تھے۔

معنم ظفر نے کہا کہ اسماعیل ہنیہ ایک تحریک کا نام ہیں، انہون نے ایمان، صبر و استقامت کی مثال قائم کی، اسرائیل نے بزدلانہ فعل کیا ہے۔ اسرائیل نے غزہ کو پتھروں کا ڈھیر بنادیا ہے، غزہ میں ایک شخص بھی پیچھے ہٹنے کو تیار نہیں۔

انہوں نے مزید کہا کہ اسرائیل اورامریکہ کے منصوبے ناکام بنادیے ہیں جب کہ فلسطین کی تحریک پورے مغرب میں پھیل گئی ہے، نعرہ صرف ایک ہی ہوتا ہے۔ 40 مسلم ممالک کی افواج کہاں ہے، جس نے مسلمانوں کا دفاع کرنا تھا وہ کہاں ہے۔