بنوں: وزیراعلیٰ خیبرپختونخوا علی امین گنڈاپور نے اعلان کیا ہے کہ بطورِ وزیر اعلیٰ صوبے میں آپریشن نہیں ہونے دیں گے۔

بنوں میں جلسے سے خطاب کرتے ہوئے وزیراعلیٰ خیبرپختونخوا علی امین گنڈاپور نے کہا کہ ہم خود اپنے فیصلے کریں گے کوئی اور نہیں کرے گا، صورتحال کو بگڑنے سے بچانے پر بنوں کے لوگوں کو سلام پیش کرتا ہوں۔

علی امین گنڈاپور کا کہنا ہے کہ ایسےعناصرموجود ہیں جو ہربات کو توڑ مروڑ کر پیش کرتے ہیں، ایک کمیٹی بنائی گئی ہے اور جیسا آپ نے کہا ویسا ہی ہوا لیکن دوسرے صوبوں میں جو رویہ رکھا گیا اس پر بھی تحفظات ہیں۔

وزیراعلیٰ کا کہنا تھا کہ ہمارا حق کھایا گیا ہمیں اس پر بھی تحفظات ہیں، ہمارے آباؤ اجداد نے ہمیں قربانی دینا سکھایا ہے اور ہم اپنے ملک کے لئے قربانیاں دیں گے۔ ہم نے اپنا گھر چھوڑا اور خانہ بدوش ہوئے جب کہ ہم رزق کمانے کے لئے دوسرے صوبوں میں گئے۔

انہوں نے کہا کہ بطور وزیراعلیٰ اعلان کرتا ہوں کہ صوبے میں آپریشن نہیں ہونے دیں گے۔ ہمارے نام پر ڈالر لے کر وسائل کھائے گئے، ہمیں اس پرتحفظات ہیں، قربانی دینا ہمارے خون اور تاریخ میں ہے اور ہم نے آپریشن کے تجربے میں دیکھا کوئی فائدہ نہیں ہوا۔

علی امین گنڈاپور کہتے ہیں کہ غلط پالیسیاں بنانے والے لوگ امریکہ کے غلام ہیں، غلاموں نے ایسی پالیسیاں بنائیں جس کی وجہ سے قربانیاں دینی پڑیں۔ امریکی غلاموں نے پالیسی پرعمل کرکے ہم پر آپریشن کیا جب کہ آزاد کشمیر کو آزاد کرانے میں پشتونوں نے اپنا کردار ادا کیا ہے۔

وزیراعلیٰ خیبرپختونخوا نے اعلان کیا کہ حق مانگنے کی بجائے چھین کر لیں گے، پاکستان کو آزاد کرانے میں خیبرپختونخوا نے کردار ادا کیا ہے۔ آپ کے 16 نکات میں تھا کہ مدارس یا گھر ہوں صرف انتظامیہ اور پولیس جائے گی تو ایسا ہی ہوگا۔

ان کا یہ بھی کہنا تھا کہ مدارس کے بچے ہمارے دلوں کے قریب ہیں کیونکہ وہ دین کی تعلیم حاصل کر رہے ہیں، مدارس کے بچوں کے لئے ہم نے بجٹ میں بھی پیسہ رکھا ہے جب کہ مدرسے کے بچے جو تعلیم حاصل کر رہے ہیں وہ ہمارے دین کی تعلیم ہے۔

وزیراعلیٰ نے اعلان کرتے ہوئے کہا کہ پہلے دن کہا تھا اپنی اصلاح کرلو، جو نہیں کرے گا وہ سزا کے لئے تیار رہے، اعلان کرتا ہوں کوئی کسی ادارے کا نام لے کر مسلح شخص کے پی میں نظرنہ آئے، پولیس کو دوبارہ احکامات جاری کرتا ہوں میں آپ کے ساتھ ہوں۔

انہوں نے مزید اعلان کیا کہ یہ بھی اعلان کرتا ہوں کے پی عوام میری عوام ہے یہ میری ٹیم ہے، کے پی عوام میری ٹیم ہے۔ کرپشن کے خلاف کھڑے ہوں اور منشیات فروش کو نہ چھوڑیں۔

علی امین گنڈاپور نے کہا کہ کسی شخصیت، پالیسی یا رویے سے اختلاف ہوسکتا ہے لیکن شہداء اور پولیس کے خاندانوں کے خلاف کچھ برداشت نہیں کرسکتے، شہداء کا ساتھ دیں گے اس دھرتی پر یہ لوگ ہمارے لئے قربانیاں دیتے رہیں گے۔

وزیر اعلیٰ نے مزید کہا کہ شہداء کے لئے غلط بات کی گئی تو میرے دل میں درد ہوتا ہے، شہداء میری ذمہ داری ہے اور ان کی عزت میری عزت ہے، کسی کو ناجائز ہاتھ ڈالنے سے پہلےسوچ لے کہ وہ مجھ پر ہاتھ ڈال رہا ہے۔