طلال چوہدری کا کہنا ہے کہ پابندی کا فیصلہ پی ٹی آئی کی ریاست مخالف پالیسیوں کی وجہ سے کیا گیا، جانتے ہیں اس فیصلے پر بہت تنقید کی جائیگی۔

اسلام آباد میں مسلم لیگ لیگ ن کے رہنما طلال چوہدری نے گفتگو کرتے ہوئے کہا ہے کہ آئین میں سیاست کرنے کے لیے کچھ پابندیاں بھی ہیں، پی ٹی آئی پرپابندی لگانے کے لیے ریفرنس سپریم کورٹ بھیجنے کا فیصلہ کیا۔

طلال چوہدری نے کہا کہ پی ٹی آئی ریاست مخالف نظریے پرکاربند ہے، پی ٹی آئی خود کو اپنے عسکری ونگ سے دور نہ کرسکی، پی ٹی آئی نے خود پابندی کے حالات پیدا کیے، پابندی کا فیصلہ پی ٹی آئی کی ریاست مخالف پالیسیوں کی وجہ سے کیا گیا۔

رہنما مسلم لیگ ن نے کہا کہ پی ٹی آئی پرپابندی کے سوا کوئی  راستہ نہیں تھا، جانتے ہیں اس فیصلے پربہت تنقید کی جائیگی، ریاست کے خلاف آئی ایم ایف اوردوسرے ملکوں کوخطوط لکھے گئے، تاریخ گواہ ہے ن لیگ نے سیاسی نقصان کیا مگرریاست کو بچایا۔

طلال چوہدری نے کہا کہ ریاست کے مفاد میں تمام معلومات سپریم کورٹ کوبھیجیں گے، یہ کیا طریقہ ہے کہ 9 مئی کے ملزمان کو ضمانتیں ملیں، سائفرکرنے والے آزاد گھومیں اورریاست کچھ بھی نہ کرے، امید ہے انصاف ہوگا پسند نا پسند یا طرف داری نہیں ہوگی۔

مسلم لیگ کے رہنما نے مزید کہا کہ پاکستان میں سیاست وہی کرسکتا ہے جس کا عسکری ونگ نہ ہو، ریاست مخالف جو بھی ہوگا ہم اس کے خلاف کھڑے ہونگے، آج کے حالات پی ٹی آئی نے خود پیدا کیےہیں، پی ٹی آئی کے خلاف ریفرنس میں تمام ثبوت شامل ہونگے۔