اسحاق ڈار نے کہا ہے کہ دشمن کی ایجنسیوں کے ہاتھوں کھیلنے والوں سے بات نہیں ہوگی، پاکستان کے جھنڈے کو تسلیم کرنا ہوگا۔

نائب وزیراعظم و وفاقی وزیر خارجہ اسحاق ڈار نے سینیٹ میں اظہارِ خیال کرتے ہوئے کہا کہ اگراپوزیشن آئندہ بات کرنے کا موقع چاہتی ہے تو ڈیکورم سے رہے، بلوچستان پاکستان کاعزیز ترین صوبہ ہے، آج کابینہ میں اس واقعے پر تفصیلی بات ہوئی۔

اسحاق ڈارنے کہا کہ وزیر اعظم 2 روز تک بلوچستان کا دورہ کرینگے، جو لوگ ریاست کو تسلیم کریں گے ان سے بات چیت ہوسکتی ہے، اس معاملہ پر سیاست نہ کی جائے، دشمن کی ایجنسیوں کے ہاتھوں کھیلنے والوں سے بات نہیں ہوگی۔

نائب وزیراعظم نے کہا کہ ملک میں ہر حال میں امن قائم کیا جائیگا، وزیرداخلہ آج بلوچستان میں پہنچ چکے ہیں، ناراضی کے معاملے پر دہشتگردی کی اجازت نہیں دی جا سکتی، ایوان میں بیٹھے دونوں سائیڈز کو اس بات کو کلئیرکرنا ہوگا۔

اسحاق ڈارنے کہا کہ اس ایوان میں بات کر لیں بحث کرا لیں، دوسری ایجنسیوں کے ہاتھوں افراتفری پھیلانے والوں کی مزمت کرنا ہوگی، جب بھی پاکستان ٹیک آف کرتا ہےعدم استحکام پھیلایا جاتا ہے۔

وزیرخارجہ نے سینیٹ میں اظہارِ خیال کرتے کہا کہ جب بھی معیشت کی سمت درست ہونے لگتی ہے کوئی نہ کوئی مسئلہ آتا ہے، ہمیں اس کا حل ڈھونڈنا ہے بیٹھ کر بات کریں کمیٹی بنا دیں، بدامنی پھیلانے والوں کو کامیاب نہیں ہونے دینا۔

اسحاق ڈارنے مزید کہا کہ کسی کوالزام نہیں دے رہا لیکن ڈائیلاگ کے نام پر ہم نے بلنڈرکیا، جیسے ملک ٹیک آف کرتا ہے ٹانگیں کھینچنا شروع کردی جاتی ہیں، اب ہم 24 ویں سے 47 ویں معیشت بن چکے ہیں، آئیں ہمیں مل کر ملک کی بہتری کےلئے سوچنا چاہیے۔

ان کا کہنا تھا کہ دہشتگردی کے خلاف اپوزیشن حکومتی ممبران ایڈوائس دیں کیا کریں، بلوچستان اوروفاقی حکومت کو ایڈوائس دیں، ناراضگی کے نام پر بات تب ہوگی جب پاکستان کے جھنڈے کو تسلیم کرنا ہوگا، ناراضگی کے نام پر دہشتگردی کرنے والوں کو ریاست کو تسلیم کرنا ہوگا، یہ کونسی ناراضگی ہے جس میں ریاست نہیں ہے۔

سینیٹ اجلاس میں شورشرابے کے دوران اپوزیشن نے بلوچستان دہشتگردی کے واقعہ پر بحث کرانے کا مطالبہ کیا۔