وزیر اعلیٰ بلوچستان سرفراز بگٹی کا کہنا ہے کہ بندوق کی زور پر نظریہ مسلط کرنے کی کوشش کو ناکام بنائیں گے۔

کوئٹہ میں پرہجوم پریس کانفرنس سے خطاب کرتے ہوئے وزیر اعلیٰ بلوچستان سرفراز بگٹی نے کہا کہ فساد پھیلانے کی کوشش کرنے والوں کو کسی صورت نہیں چھوڑا جائے گا۔

ان کا کہنا تھا کہ بہت لوگ ہیں جو کہتے ہیں مذاکرات ہونے چاہئیں، مذاکرات کر لیں لیکن کس سے ہونے چاہئیں اور ظلم کیوں کیا جاتا ہے؟

دہشت گرد اپنے لیے سافٹ ٹارگٹ تلاش کرتے ہیں، کاروباری لوگوں کو ٹارگٹ کیا جا رہا ہے ان کا کیا قصور ہے؟ یہ ریاست کی لڑائی ہے، ریاست اپنی رٹ کے لیے ہر ضروری اقدام کریگی۔

جو دہشت گردوں کی حمایت کر رہے ہیں، ان کے لیے بھی سوچنے کا مقام ہے، ریاست مظلوم کے ساتھ کھڑی ہو گی، حکومت ظالم کے ساتھ کھڑی نہیں ہوتی۔

وزیر اعلیٰ نے کہا کہ معصوم لوگوں کو بسوں سے اتار کر شہید کیا گیا، پنجابیوں کے ساتھ پشتون اور بلوچ بھائیوں کو بھی شہید کیا گیا، بندوق کے زور پر ریاست کے اندر ظلم کی اجازت نہیں دی جائے گی۔

ایسے بھی لوگ ہیں جو سوشل میڈیا کے ذریعے پروپیگنڈا کرتے ہیں، یہ کوئی بلوچ نہیں بلکہ دہشت گرد ہیں، ان کا کوئی مذہب نہیں، معصوم لوگوں کو انکی فیملی کے سامنے شہید کرنا ظلم ہے۔

یہ دہشت گرد کونسی روایات کی بات کرتے ہیں، اب تک 21 دہشت گردوں کو ٹھکانے لگایا جا چکا ہے، اس وقت بھی 4 سے 5 دہشت گردوں کو جہنم واصل کیا جا چکا ہے۔

انہوں نے کہا کہ گزشتہ رات دہشت گردوں نے مختلف مقامات پر حملے کیے، دہشت گردوں کے حملوں میں 38 معصوم شہری شہید ہوئے، دہشت گردوں نے ہائی ویز پر معصوم شہریوں کو نشانہ بنایا گیا۔

دہشت گردوں نے بلوچستان میں پاکستانیوں کو شہید کیا، دہشت گردوں کا کوئی مذہب نہیں۔

وزیر اعلیٰ بلوچستان میر سرفراز بگٹی نے مزید کہا کہ دہشت گرد اتنے بہادرہیں تو موقع پر موجود رہتے۔