وزیراعلیٰ پنجاب مریم نوازکے بیان پرایم کیو ایم پاکستان کے رہنما مصطفیٰ کمال نے جواب میں کہا کہ پیاری مریم بی بی، آپ کے قیمتی مشورے کا شکریہ۔

مصطفیٰ کمال نے اپنے بیان میں کہا کہ سندھ حکومت کا برتاؤ اچھا ہوتا توہمیں آپ سے ملنے کی کیا ضرورت تھی۔ سندھ حکومت کا برتاؤ پچھلے 15سال سے اچھا ہوتا تو آپ کے پاس نہ آتے۔

انھوں نے کہا کہ ہمیں کیا ضرورت تھی کہ 2024 الیکشن سے 4 ماہ قبل لاہورآتے، آپ کی پارٹی کی غیرمشروط حمایت کا اعلان کیا جس پر آج تک قائم ہیں۔

رہنما ایم کیو ایم پاکستان نے کہا کہ میں نے پنجاب حکومت سے نہیں ریاست پاکستان کے سربراہ سے درخواست کی،  ریاست پاکستان کے سربراہ وزیراعظم شہباز شریف ہیں ان سے درخواست کی، وزیراعظم سے درخواست کی کہ خدارا سندھ بالخصوص کراچی پررحم کریں۔

وزیراعلٰی پنجاب مریم نواز نے اپنے بیان میں مصطفٰی کمال کو کیا کہا؟ پڑھیں

مصطفیٰ کمال نے کہا کہ ہمیں بھی پاکستان میں برابرکا شہری سمجھ کرجینے کا حق دیں، ہمیں بھی جینے کا حق دیں کیونکہ ریاست ماں جیسی ہوتی ہے، گزشتہ کئی ماہ سے وزیراعظم سے ملاقاتوں میں بارہا توجہ دلائی۔

ایم کیوایم پاکستان کے رہنما نے مریم نواز کے جواب میں مزید کہا کہ وزیراعظم نے سندھ کے شہریوں کیلئے آسانیاں پیدا کرنے کا وعدہ کیا، ہم صرف انہی وعدوں کی تکمیل کے منتظرہیں۔