اسلام آباد ہائیکورٹ نے آئی جی اسلام آباد کو پی ٹی آئی رہنماﺅں پر درج جعلی مقدمات ختم کرنے کا حکم دے دیا، عدالت نے آئی جی اسلام آباد کو معاملات حل کرنے کی ہدایت کردی۔

چیف جسٹس اسلام آباد ہائی کورٹ نے کہا کہ میں نے پہلے بھی آرڈر کیا تھا کہ ان معاملات کو ذرا اچھے طریقے سے دیکھ لیں، درخواست پولیس کے کنڈکٹ سے متعلق ہے۔

اسلام آباد ہائی کورٹ میں پی ٹی آئی رہنماﺅں شعیب شاہین، علی بخاری اورعامرمغل کو ہراساں کرنے کے خلاف کیسز کی سماعت ہوئی۔

چیف جسٹس عامرفاروق نے کیس کی سماعت کی، وکیل درخواست گزارعمیر بلوچ جبکہ عدالتی حکم پر آئی جی اسلام آباد عدالت کے روبرو پیش ہوئے۔

وکیل درخواست گزار نے مؤقف اپنایا کہ پولیس ہراساں کرتی ہے۔

چیف جسٹس اسلام آباد ہائی کورٹ نے آئی جی اسلام آباد سے استفسار کیا کہ درخواست ہے کہ پولیس ہراساں کرتی ہے جس پرآئی جی اسلام آباد نے جواب دیا کہ 24 کو آرڈر پاس ہوا اسکے بعد ایک دن ملا تمام فائلز منگوائی ہیں کیسز دیکھے ہیں۔

وکیل درخواست گزارعمیر بلوچ نے کہاکہ جعلی ایف آئی آر بھی درج کی گئی ہیں جس پر چیف جسٹس نے کہا کہ آئی جی صاحب اس کو دیکھ لیں اچھا نہیں لگتا جو جعلی مقدمات ہیں انکو ختم کریں۔

آئی جی اسلام آباد نے عدالت کو بتایا کہ میں درخواست گزاروں کو بلاؤں گا ان سے میٹنگ کروں گا جس پر چیف جسٹس عامر فاروق نے کہا کہ ان کو بلا کربیٹھا نہ لیجے گا۔ عمیر بلوچ کی موجودگی میں میٹنگ کیجیے گا۔

اسلام آباد ہائی کورٹ کے چیف جسٹس عامر فاروق نے آئی جی اسلام آباد کو معاملات حل کرنے کی ہدایت کرتے ہوئے کیس کی سماعت دو ہفتوں کیلئے ملتوی کر دی۔