گورنر سندھ کامران خان ٹیسوری نے کہا ہے کہ سچے پاکستانی افواج کے شانہ بشانہ کھڑے رہیں گے۔

یوم دفاع کے حوالے سے ایک تقریب سےخطاب میں گورنر سندھ کامران خان ٹیسوری نے کہا کہ آج کا دن شہدا کو یاد کرنے کا دن ہے، ہم شہدا اور ان کے لواحقین کو سلام پیش کرتے ہیں۔

انہوں نے کہا کہ 6 ستمبر نہ ہو تو 14 اگست کی خوشی نہیں منا سکتے، بزدل دشمن 6 ستمبر کی تاریکی میں حملہ آور ہوا۔

گورنر سندھ کا کہنا تھا کہ شہیدوں کا قرض کوئی نہیں اتار سکتا، وطن کی حفاظت ہم سب نے مل کرکرنی ہے، 9 مئی جیسے واقعات کریں گے تو شہدا کے لواحقین کو کیا جواب دیں گے۔

ان کا کہنا تھا کہ ایک ماں نے بیٹے کی قربانی ہمارے بچوں کا مستقبل سنوارنے کے لیے دی، کیا ہم اس ماں کا قرض اتار سکتے ہیں؟ مجھ سمیت کوئی بھی شخص شہدا کے لواحقین کا قرض نہیں اتار سکتا۔

کامران خان ٹیسوری نے کہا کہ ہم سکون کی زندگی بسر کرتے ہیں اس کے پیچھے شہدا کا خون ہے، حکومت معیشت کی بہتری کے لیے اقدامات کر رہی ہے، سرمایہ کاروں کا پاکستان پر اعتماد بحال ہوا ہے۔

ایک ماں سے ملاقات ہوئی، اس نے کہا میرا ایک بیٹا شہید ہو چکا ہے، ماں نے کہا جس یونٹ میں ایک بیٹا شہید ہوا اسی میں دوسرا بیٹا کام کر رہا ہے، شہید کی ماں نے کہاں میرے 3 بیٹے ہیں، وہ اس ملک پر قربان ہیں۔

انہوں نے کہا کہ نفرت انگیز بیانیے کے ملک میں کچھ خریدار بھی ہیں۔

گورنر سندھ کامران خان ٹیسوری نے یوم دفاع کے موقع پر اپنے پیغام میں مزید کہا کہ کچھ لوگ بیرونی طاقت کے نفرت انگیز بیانیے کو بیچ رہے ہیں اور سوشل میڈیا پر نفرت کا بیانیہ پھیلایا جا رہا ہے۔