انسدادِ انسانی اسمگلنگ سرکل لاہورنے بڑی کارروائیاں کرتے ہوئے دو اشتہاریوں سمیت تین ملزمان کو گرفتارکرکے 201 پاکستانی پاسپورٹس برآمد کر لیے۔

ملزمان کی شناخت ثمینہ بی بی، لیاقت اورعثمان اشرف کے نام سے ہوئی۔ ملزمہ ثمینہ بی بی کو چھاپہ مار کاروائی میں بحریہ ٹاؤن لاہورسے گرفتار کیا گیا۔

اشتہاری ملزمہ نے شہری کو شادی کا جھانسہ دے کر یو کے بھجوانے کے لیے 50 لاکھ روپے ہتھیائے۔ ملزمہ کا نام سال 2023 سے انسدادِ انسانی اسمگلنگ لاہورسرکل کی مطلوبہ ملزمان کی فہرست میں شامل تھا جبکہ ملزم نعیم لیاقت کو شادمان میں واقع پرشین ٹریول نامی ایجنسی کے دفتر سے گرفتار کیا گیا۔

چھاپہ مارکارروائیوں میں دفتر سے 201 پاکستانی پاسپورٹ برآمد کیے گئے۔ ملزم بغیرکسی لائسنس شہریوں سے پاسپورٹس وصول کر رہا تھا۔ ملزم پاسپورٹس کی برآمدگی کے حوالے سے حکام کو مطمئن نہ کر سکا۔

ملزم بغیرلائسنس شہریوں کو ایران زیارات کے لیے بھجوانے میں بھی ملوث پایا گیا۔ ایک اور کارروائی میں اشتہاری ملزم محمد اشرف کو لاہور سے گرفتار کیا گیا۔

ملزم شہریوں کو بیرون ملک ملازمت کا جھانسہ دے کر لاکھوں روپے ہتھیانے میں ملوث پایا گیا۔ ملزم نے شہری کو مسقط ملازمت کی غرض سے بھجوانے کے لیے 6 لاکھ روپے وصول کیے۔

ملزم شہری کو مسقط بھجوانے میں ناکام رہا اور روپوش ہو گیا۔ ملزم کا نام سال 2023 سے ایف آئی اے لاہور کی مطلوبہ ملزمان کی فہرست میں شامل ہے۔ ملزمان کو گرفتارکرکے تفتیش کا آغاز کر دیا گیا۔