وزیرِ اعظم شہباز شریف نے نیویارک میں برطانوی ہم منصب وزیرِ اعظم کیئر اسٹارمر سے ملاقات کی۔

ملاقات میں پاکستان اور برطانیہ کے مابین دو طرفہ تعلقات اور باہمی دلچسپی کے امور پر گفتگو ہوئی، دونوں رہنماؤں کے مابین تعلقات کو مزید فروغ دینے پر اتفاق کیا گیا۔

ملاقات میں مختلف شعبوں بالخصوص تجارت و سرمایہ کاری میں تعلقات کے فروغ پر اتفاق اور پاکستان کی معاشی صورتحال پر بھی گفتگو ہوئی۔

وزیرِ اعظم نے برطانوی ہم منصب سے ملاقات کے دوران معاشی ترقی کیلئے حکومتی اقدامات، ایف بی آر اصلاحات اور ٹیکس بیس میں اضافے پر روشنی ڈالی۔

وزیرِ اعظم نے موسمیاتی تبدیلی کے مضر اثرات سے پاکستان کو درپیش مسائل سے آگاہ کیا، اور دہشتگردی کے خلاف جنگ میں پاکستان کی قربانیوں کا ذکر کیا۔

 وزیر اعظم نے کہا کہ دھشتگردی ایک عالمی مسئلہ ہے جس کے تدارک کیلئے عالمی برادری کو مل کر کام کرنا ہوگا۔

وزیرِ اعظم نے پاکستان میں سرمایہ کاری کے مواقع اور منصوبوں پر روشنی ڈالی اور کہا کہ برطانیہ میں مقیم پاکستانیوں کا دونوں ممالک کی ترقی میں اہم کردار ہے۔

وزیراعظم شہباز شریف نے برطانوی ہم منصب سے ملاقات کے دوران  عوامی روابط کے فروغ اور تبادلوں سے باہمی طور پر مفید ترقی کے اہداف کے حصول کے عزم کا اعادہ کیا۔