آسٹریلیا کے دوسرے بڑے شہر میلبورن میں غزہ جنگ مخالف مظاہرے کے دوران پولیس کے ساتھ جھڑپوں کے بعد درجنوں افراد کو گرفتار کر لیا گیا ہے۔

پولیس کا کہنا ہے کہ مظاہرین کی جانب سے پتھر، کھاد اور تیزاب سے بھری بوتلوں سے پولیس اہلکاروں پر پتھراؤ کیا گیا۔

اس کے برعکس مظاہرین کا کہنا تھا کہ پولیس اہلکاروں نے سخت کارروائی کی اور پر امن مظاہرے پر فلیش بینگ گرینیڈ اور اشتعال انگیز اسپرے کیا گیا۔

آسٹریلیا کے وزیر اعظم انتھونی البانیز نے تشدد کی مذمت کرتے ہوئے کہا ہے کہ آسٹریلیا کے لوگوں کو احتجاج کرنے کا حق حاصل ہے لیکن انہیں پرامن طریقے سے احتجاج کرنا ہوگا۔

حکام کا کہنا ہے کہ مظاہرین نے لینڈ فورسز انٹرنیشنل لینڈ ڈیفنس نمائش کو نشانہ بناتے ہوئے ہونے والے مظاہرے میں تقریبا 1200 افراد نے شرکت کی، جن میں سے بہت سے لوگوں نے فلسطینی جھنڈے اٹھا رکھے تھے اور فلسطین کے حق میں نعرے لگائے تھے۔

مقامی ذرائع ابلاغ کے مطابق کنونشن کے دوران فوجی توپ خانے، ٹرکوں اور نیم خودکار ہتھیاروں کی نمائش کی گئی ہے۔ کارکنوں کا کہنا تھا کہ وہ احتجاج کر رہے ہیں کیونکہ ان کا دعویٰ ہے کہ غزہ میں اسرائیلی افواج کی جانب سے دکھائے جانے والے بہت سے ہتھیار استعمال کیے گئے ہیں۔