وزیراعلٰی خیبرپختون خوا نے اپنی گرفتاری کے آرڈرکیخلاف سیشن عدالت سے رجوع کرلیا۔

تفصیلات کے مطابق ڈسٹرکٹ اینڈ سیشن کورٹس اسلام آباد میں اسلحہ و شراب برآمدگی کیس میں وزیراعلیٰ کے پی علی امین گنڈاپور کے وارنٹ گرفتاری کے معاملے پر علی امین گنڈاپور نے گزشتہ روز کے جوڈیشل مجسٹریٹ کے آرڈر کیخلاف سیشن عدالت سے رجوع کرلیا۔

علی امین گنڈاپور نے وکیل ظہورالحسن ایڈووکیٹ کے ذریعے نظرثانی درخواست دائرکردی جس میں انھوں نے مؤقف اپنایا کہ علی امین گنڈاپور کی مقدمے میں بریت کی درخواست زیر التواء ہے۔

وزیراعلٰی کے پی کی جانب سے درخواست میں مؤقف اپنایا گیا کہ گزشتہ روزجوڈیشل مجسٹریٹ نے خلاف قانون وارنٹ گرفتاری جاری کیے، استدعا ہے کہ وارنٹ گرفتاری جاری کرنے کے حکم نامے کیخلاف نظر ثانی منظورکی جائے۔

وکیل درخواست گزارنےاستدعا کی کہ علی امین گنڈاپور کے ناقابل ضمانت وارنٹ گرفتاری کو کالعدم قراردیا جائے، جوڈیشل مجسٹریٹ کو علی امین گنڈاپور کی بریت کی درخواست پر فیصلہ کرنے کا حکم دیا جائے۔

واضح رہے کہ گذشتہ روزاسلام آباد کی مقامی عدالت نے اسلحہ و شراب برآمدگی کیس میں وزیراعلٰی خیبرپختون خواعلی امین گنڈا پور کے ناقابلِ ضمانت وارنٹ گرفتاری جاری کیے تھے۔

سول جج شائستہ خان کنڈی نے ایس ایچ او تھانہ بھارہ کہو کو آج علی امین گنڈاپورکوگرفتار کرکے عدالت میں پیش کرنے کا حکم دیا تھا۔