اسلام آباد ہائی کورٹ نے توشہ خانہ ٹو کیس میں بڑا حکم جاری کردیا۔

عدالت نے کہا ہے کہ نیشنل جوڈیشل پالیسی کے مطابق 5 دن میں ضمانت پر فیصلہ کرنا لازم ہے، اسپیشل جج سنٹرل پالیسی مینڈیٹ کے مطابق ضمانت پر فیصلہ کرسکتے ہیں۔

بانی پی ٹی آئی اور بشری بی بی کی درخواست ضمانت پر آئندہ پانچ دنوں میں فیصلے کا امکان ہے۔

بانی پی ٹی آئی اور بشری بی بی کی ضمانت کا فیصلہ جلد کرنے کی درخواست کا تحریری فیصلہ جاری کردیا گیا۔ جسٹس میاں گل حسن اورنگزیب نے تین صفحات پر مشتمل محفوظ فیصلہ جاری کیا۔

عدالتی فیصلے کے مطابق نیشنل جوڈیشل پالیسی کے مطابق مجسٹریٹ کے لیے 3 دن میں ضمانت کا فیصلہ کرنا لازم ہے، نیشنل جوڈیشل پالیسی کے مطابق سیشن کورٹ کو 5، ہائیکورٹ کے لئے 7 دن میں ضمانت کا فیصلہ کرنا لازم ہے۔

اسلام آباد ہائی کورٹ کے فیصلے کے مطابق اسپیشل کورٹ پر سیشن کورٹ کے لیے دیا وقت اپلائی ہوگا،  درخواست گزار کے مطابق ان کی درخواست ضمانت بغیر وجہ التوا کا شکار ہے۔

عدالتی فیصلے کے مطابق درخواست گزار وکلا نے ضمانت کی درخواستوں پر جلد فیصلہ کی ہدایت کرنے کی استدعا کی، ایف آئی اے نے مؤقف اختیار کیا قانون کے مطابق عدالت ضمانت کی درخواستوں پر فیصلہ کرے گی۔

ایف آئی اے کے پاس کیس ٹرانسفر ہونے کے بعد ضمانت کی درخواستیں اسپیشل جج سنٹرل کے پاس زیر التوا ہیں۔