صوبائی وزیراطلاعات پنجاب نے کہا ہے کہ دیگرصوبے مریم نواز کی نقل کرتے ہیں، پنجاب حکومت کوئی ایسا کام نہیں کررہی جو فائلوں تک محدود ہو۔ 

لاہورمیں وزیراطلاعات عظمٰی بخاری نے نیوزکانفرنس کرتے ہوئے کہا کہ پٹرول کی قیمتوں میں کمی ہوئی تو کرائے واپس کرائے۔ معلوم نہیں لوگ اپنے صوبے میں کام کرنے والوں کو برا کیوں سمجھتے ہیں۔ سیاسی مخالفین پوائنٹ اسکورنگ کرتے ہیں۔ عام آدمی کو حکومت کے کام بتانا میری ذمے داری ہے۔

وزیراطلاعات پنجاب نے کہا کہ وزیراعلٰی پنجاب 16 سے 18 گھنٹے کام کرتی ہیں۔ مریم نواز نے یاد کرایا کہ روٹی بہت اہم ہے، قیمت کم ہونی چاہیے۔ مریم نواز ایئرایمبولنس لائیں تو باقیوں نے کہا کہ ہم بھی لائیں گے۔ باقیوں کو بتایا کہ کرایوں میں کمی کردی ہے توان کی دوڑیں لگ گئیں۔

عظمٰی بخاری نے کہا کہ اپنی چھت اپنا گھر میں لوگ دلچسپی کا اظہار کررہے ہیں، اچھا رسپانس آ رہا ہے۔ پنجاب حکومت بلاسود قرضوں سے متعلق پروگرام شروع کررہی ہے۔ تفصیلات، فنڈنگ طے ہونے کے بعد پروگرام بنتا ہے۔ قرض پرکسی قسم کا کوئی ٹیکس نہیں ہوگا۔

انھوں نے کہا کہ وزیراعلٰی پنجاب ہرپروگرام کی خود نگرانی کرتی ہیں۔ وزیراعلٰی پنجاب جلد سولرسسٹم کا افتتاح کریں گی۔ وزیراعلٰی پنجاب کاغذی کارروائی کے بجائے عملی اقدامات پریقین رکھتی ہیں۔ بجلی کے بلوں میں ریلیف وزیراعلٰی پنجاب کا اہم اقدام ہے۔