مشعال ملک نے کہا ہے کہ مقبوضہ کشمیر میں مسلمانوں کو اقلیت میں بدلنے کی کوشش کی جا رہی ہے، حریت قیادت پر تشدد کیا جا رہا ہے۔ 

اسلام آباد میں کشمیری رہنما مشعال ملک نے ڈسٹرکٹ بارکی تقریب سے خطاب کرتے ہوئے کہا کہ مقبوضہ کشمیرمیں انسانی حقوق کی خلاف ورزیاں ہو رہی ہیں، مقبوضہ کشمیرمیں مسلمانوں کو اقلیت میں بدلنے کی کوشش کی جا رہی ہے۔

مشعال ملک نے کہا کہ کشمیری عوام اپنے حقِ خود ارادیت کے لیے قربانیاں دے رہے ہیں، مقبوضہ کشمیر میں پچاس لاکھ بھارتیوں کو ڈومیسائل جاری کیے گئے، اس طرح یہ ڈومیسائل دیتے رہے تو یہ اکثریت میں تبدیل ہو جائیں گے۔

ڈسٹرکٹ بارسے خطاب کرتے ہوئے کشمیری رہنما نے کہا کہ 5 اگست دو ہزار انیس کو بھارت نے مقبوضہ کشمیر پر قبضہ کیا، مقبوضہ کشمیرمیں الیکشن کرائے جا رہے ہیں۔ بھارت دنیا کو دکھانا چاہتا ہے کہ کشمیرمیں بھارتی ووٹرزموجود ہیں۔

مشعال ملک نے کہا کہ اقوام متحدہ کشمیر سے متعلق اپنی قراردادوں پرعمل کرائے۔  بھارتی آرمی مقبوضہ کشمیر میں جو کچھ کرائے انھیں کوئی پوچھنے والا نہیں ہیں۔

کشمیری رہنما نے اپنے خطاب میں کہا کہ کشمیرکو ہائی جیک کیا جا رہا ہے، حریت قیادت جیلوں میں بند ہیں، ارشد صحرائی کو شہید کیا گیا اورعلی گیلانی کو زہردیا گیا۔ حریت قیادت پر تشدد کیا جا رہا ہے۔

مشعال ملک نے مزید کہا کہ حریت رہنما یاسین ملک کو جھوٹے مقدمےمیں جیل بند کیا گیا، بھارت کئی دہائیوں سے مظلوم کشمیریوں کا استحصال کر رہا ہے، بھارت نے کشمیری سیاسی قیادت کونظربند کررکھا ہے۔