وزیراعظم نے انسداد پولیو کے قطرے پلا کر خصوصی مہم کا افتتاح کردیا۔

ملک بھر میں کل سے 7 روزہ انسداد پولیو مہم کا آغاز ہو گا، وزیراعظم نے اسلام آباد میں قطرے پلا کر ملک بھر کے 115 اضلاع میں پولیو مہم کا آغاز کر دیا۔

5رپورٹ کے مطابق 5 سال سے کم عمر 3 کروڑ بچوں کو پولیو سے بچاؤ کے قطرے پلائے جائیں گے۔

مہم کے لیے 9 سے 15 ستمبر تک 2 لاکھ 86 ہزار پولیو ورکرز گھر گھر جا کر پولیو سے بچاؤ کے قطرے پلائیں گے۔

خصوصی مہم کے افتتاح کے موقع پر وزیر اعظم شہباز شریف نے اپنے خطاب میں کہا کہ آج ہم نے انسداد پولیو مہم کا آغاز کیا ہے، قابل ٹیم کی نگرانی میں انسداد پولیو مہم شروع ہو رہی ہے۔

انہوں نے کہا کہ ہمارے پولیو ورکرز کا پورے ملک میں جال بچھا ہوا ہے، یقین ہے کہ اجتماعی کوششوں سے ملک کو پولیو سےپاک کریں گے، انسداد پولیو کے لیے بین الاقوامی شراکت داروں کے تعاون پر مشکور ہیں۔

ان کا کہنا تھا کہ ہم نے یقینی بنانا ہے کہ ملک میں پولیو کا کوئی بھی مریض نہ ہو، پولیو کا خاتمہ جلد ہوگا، خصوصی انسداد پولیو مہم کا ایک مؤثر نتیجہ نکلے گا۔

وزیر اعظم شہباز شریف نے مزید کہا کہ مہم کے دوران قانون نافذ کرنے والے اداروں کا کردار بھی قابل تعریف ہے۔