سابق وزیراعلٰی پنجاب پرویزالٰہی کے شریک ملزم محمد خان بھٹی نے احتساب عدالت لاہور میں ریفرنس سے ڈسچارج کرنے کی درخواست دائر کر دی۔

وکیل ملزم اورنگزیب ایڈووکیٹ نے درخواست میں مؤقف اپنایا کہ محمد خان بھٹی نے کوئی مالی فائدہ حاصل نہیں کیا، جس ملزم نے مالی فائدہ نہ لیا ہو اس کیخلاف احتساب عدالت ٹرائل نہیں کرسکتی۔

وکیل ملزم نے استدعا کی کہ محمد خان بھٹی کا نام ریفرنس سے نکال دیا جائے۔

نیب پراسیکیوٹر وارث علی جنجوعہ عدالت میں پیش ہوئے، عدالت نے ان سے استفسارکیا کہ آپ کا کیا مؤقف ہے؟

نیب کے پراسیکیوٹرنے جواب دیا کہ ہم اس درخواست پر مشاورت کے بعد جواب داخل کریں گے۔

احتساب عدالت نے آئندہ سماعت پر محمد خان بھٹی کی درخواست پر نیب سے تحریری جواب طلب کر لیا۔ پرویز الٰہی کے وکیل امجد پرویز نے بھی محمد خان کی درخواست کی حمایت کی۔

امجد پرویزایڈووکیٹ نے کہا کہ پرویزالٰہی کیخلاف بھی مالی فائدہ حاصل کرنے کا کوئی ثبوت نہیں ہے۔ اس درخواست پرمیں بھی عدالت کی معاونت کرونگا۔

احتساب عدالت کے جج زبیر شہزاد کیانی نے ریفرنس پر سماعت کی۔ شریک ملزمان نعیم اقبال، آصف اوراصغر کو جیل سے پیش کیا گیا۔

ترقیاتی منصوبوں کی اربوں روپے کی کرپشن اور کک بیکس وصولی کے ریفرنس پراحتساب عدالت نے پرویز الٰہی اور دیگر کیخلاف ریفرنس پر سماعت 17 اکتوبرتک ملتوی کر دی۔

چوہدری پرویزالٰہی ویل چیئرزپرعدالت میں پیش ہوئے۔ شریک ملزم سابق پرنسپل سیکرٹری محمد خان بھٹی کو جیل سے پیش کیا گیا۔

وکلا ملزمان نے مؤقف اپنایا کہ ملزمان پر فرد جرم عائد کرنے سے پہلے عدالتی دائرہ کارکا فیصلہ کیا جائے۔