دنیا کے امیر ترین اور ٹیسلا اور اسپیس ایکس کے مالک ایلون مسک کی دولت میں ایک دن میں 92 کھرب روپے کا اضافہ ہو گیا۔

سماجی رابطے کی معروف ویب سائٹ ایکس کے مالک ایلون مسک کی دولت میں 92 کھرب روپے کا اضافہ دنیا کے بیشتر ممالک کے سالانہ بجٹ سے بھی کہیں زیادہ ہے۔

امریکا کے معروف جریدے کی رپورٹ کے مطابق ایلون مسک کے اکاؤنٹ میں گزشتہ روز 33 ارب 50 کروڑ ڈالر (92 کھرب پاکستانی روپے سے زائد) کی خطیر رقم منتقل ہوئی۔

امریکی جریدے نے اپنی رپورٹ میں کہا ہے کہ ایلون مسک کو حاصل ہونے والے یہ رقم دراصل ان کی الیکٹرک گاڑیاں بنانے والی کمپنی ٹیسلا کے حصص کی قیمتوں میں اضافے کی وجہ سے حاصل ہوئی ہے، ٹیسلا کے حصص کی قیمتوں میں گزشتہ روز 22 فی صد اضافہ ہوا تھا۔

واضح رہے کہ ایلون مسک پہلے ہی اس حوالے سے ایک پیشگوئی کر چکے ہیں کہ 2025 میں الیکٹرک گاڑیوں کی فروخت میں 30 فی صد اضافے کا امکان ہے۔

ٹیسلا کے ترجمان کے مطابق ایلون مسک کمپنی کے 21 فی صد حصص کے مالک ہیں اور ان کی مجموعی دولت کا 68 فی صد حصہ بھی ٹیسلا سے ہی آتا ہے۔

یاد رہے کہ دنیا کے امیر ترین افراد کی فہرست میں ایلون مسک 270.3 ارب ڈالر کے ساتھ ٹاپ پر ہیں، دوسرے نمبر پر جیف بیزوز ہیں جو 209 ارب ڈالرز کے مالک ہیں جبکہ میٹا کے مالک مارک زکر برگ 201 ارب ڈالر کے ساتھ دنیا کے تیسرے امیر ترین شخص ہیں۔