سابق اسپیکرسندھ اسمبلی کا کہنا ہے کہ دوسرے صوبوں کی طرح سندھ میں بھی آئینی بینچ بنانے کیلئے جلد قرارداد لائی جائے۔

سابق اسپیکرسندھ اسمبلی آغا سراج درانی نے کراچی میں احتساب عدالت کے باہرمیڈیا سے گفتگوکرتے ہوئے کہا کہ 26 ویں آئینی ترمیم پر قوم کو مبارکباد دیتا ہوں، یہ اعزازچیئرمین بلاول بھٹو کودوں گا۔

آغا سراج درانی نے کہا کہ چیئرمین بلاول بھٹو نے محترمہ بینظیر بھٹو شہید کا تسلسل قائم رکھا، جس طرح چیئرمین بلاول بھٹو نے دن رات کوششیں کی اس ہی طرح شہید بی بی بھی کرتی تھیں۔

آصف علی زرداری نے بھی 18ویں ترمیم بڑی جہدوجہد کے بعد پاس کروائی تھی، شہید ذوالفقارعلی بھٹو بھی اس ہی طرح کام کرتے تھے، اس ترمیم سے سب سے زیادہ فائدہ عوام کوہوگا۔

انھوں نے کہا کہ اب عوام کے سالوں سے زیرسماعت کیسزکی شنوائی جلدی ہوگی، میں خود سب کے سامنے مثال ہوں 6 سال سے کیس چل رہا ہے، 4 سال تک جیل میں بھی رہا ہوں۔

سابق اسپیکرسندھ اسمبلی نے مزید کہا کہ دوسرے صوبوں کی طرح سندھ میں بھی آئینی بینچ بنانے کیلئے جلد قرارداد بھی لائی جائے۔

سابق اسپیکرآغا سراج درانی ودیگر کے خلاف آمدن سے زائد اثاثے بنانے کے ریفرنس میں نیب ترمیم کے بعد ریفرنس کا دائراختیاراورشریک ملزم کی بریت کی درخواست پر سماعت ہوئی۔

نیب پراسیکیوٹرکی جانب سے جاری رپورٹ جمع کرانے کیلئے مہلت کی استدعا کی گئی جس کے بعد عدالت نے ریفرنس کی سماعت 11 نومبر تک ملتوی کردی۔