توشہ خانہ کیس ٹومیں گرفتاربانی پی ٹی آئی کی اہلیہ بشریٰ بی بی کو 9 ماہ بعد ضمانت کے بعد جیل سے رہا کردیا گیا۔

بانی پی ٹی آئی کی اہلیہ بشری بی بی توشہ خانہ ٹو کیس میں ضمانت پر رہائی کے بعد سخت سیکیورٹی حصارمیں بنی گالہ پہنچیں۔ اپوزیشن لیڈرعمرایوب بھی ان کے ہمراہ تھے۔

اڈیالہ جیل انتظامیہ نے روبکارموصول ہونے کے بعد قانونی کارروائی مکمل کرکے بشری بی بی کو رہا کیا، بشری بی بی مجموعی طورپر9 ماہ جیل میں رہیں۔

سزا کا فیصلہ آنے کے بعد بشری بی بی نے خود جیل میں آکرگرفتاری دی تھی۔ بشری بی بی کو اڈیالہ جیل کے بجائے بنی گالہ منتقل کیا گیا تھا۔کمشنراسلام باد نے بنی گالہ کو سب جیل قراردیا تھا۔

اسلام آباد ہائی کورٹ نے بشری بی بی کی توشہ خانہ سزا معطل کردی تھی۔ بشری بی بی کو توشہ خانہ ٹو کیس میں دوبارہ گرفتار کیا گیا تھا۔

اسلام آباد اسپیشل جج سینٹرل کی عدالت نے بشری بی بی کی توشہ خانہ ٹو کیس میں درخواست ضمانت کے معاملے پران کی رہائی کی روبکار جاری کی۔

بشری بی بی کے ضمانتی مچلکے اسپیشل جج سینٹرل شاہ رخ ارجمند کی عدالت میں جمع کروائے گئے۔ ضمانتی مچلکہ ملک طارق محمود نون نے دیا۔

واضح رہے کہ اسلام آباد ہائیکورٹ نے گزشتہ روز توشہ خانہ کیس ٹومیں بشریٰ بی بی کی ضمانت منظورکی تھی۔ گزشتہ روز بشریٰ بی بی کی ضمانت کے معاملے میں روبکار جاری نہیں ہوسکی تھی۔