آئی ایم ایف اور ورلڈ بینک کے سالانہ اجلاس میں گورنراسٹیٹ بینک جمیل احمد کی عالمی سرمایہ کاروں سے ملاقات ہوئی۔

اسٹیٹ بینک کے اعلامیے کے مطابق واشنگٹن میں منعقدہ تقریبات میں گورنراسٹیٹ بینک شریک ہوئے، تقریبات میں گورنراسٹیٹ بینک نےعالمی ریٹنگ ایجنسیوں اور عالمی سرمایہ کاروں سے ملاقات کی۔

ملاقات میں گورنر اسٹیٹ بینک نے معاشی اشاریوں کی بہتری کا جائزہ پیش کیا، گورنر اسٹیٹ بینک نے امید افزا اقتصادی منظر نامے کو اجاگر کیا۔

گورنر اسٹیٹ بینک نے کہا کہ پاکستان سمیت عالمی،ابھرتی ہوئی معیشتوں کو چیلنجز درپیش ہیں، چیلنجز سے نمٹنے کے لیےلازمی پالیسی اقدامات کی ضرورت ہے۔

انہوں نے کہا کہ مہنگائی اب واضح طور پر نیچے جا رہی ہے، بیرونی کھاتہ نمایاں طور پر بہتر ہوا، معاشی سرگرمیاں بحال ہو رہی ہیں۔

گورنر اسٹیٹ بینک کا کہنا تھا کہ معیشت درست سمت پر گامزن ہے، مہنگائی ستمبر 2024 میں 6.9 فیصد رہ گئی ہے، بیرونی خسارہ بھی نمایاں طور پر کم ہوا ہے۔

انہوں نے کہا کہ رقوم کی آمد میں بہتری نے زرمبادلہ ذخائر 11 ارب ڈالر تک پہنچا دیے ہیں، زرمبادلہ کے ذخائر جنوری 2023 میں 3.1 ارب ڈالر رہ گئے تھے۔

گورنر اسٹیٹ بینک جمیل احمد نے مزید کہا کہ زرمبادلہ ذخائر کو جون 2025 کے آخر تک 13 ارب ڈالر تک پہنچانا ہے۔