پاکستان مسلم لیگ ق کے سربراہ چوہدری شجاعت حسین نے پارٹی کو ملک بھر میں دوبارہ متحرک کرنے کا فیصلہ کیا ہے۔

پاکستان مسلم لیگ ق کی جانب سے جاری کردہ نوٹیفیکیشن کے مطابق پارٹی کو متحرک کرنے کے لیے ڈاکٹر محمد امجد کو چیف آرگنائزر مقرر کر دیا گیا ہے۔

چوہدری شجاعت حسین نے اس حوالے سے ہدایات جاری کی ہیں کہ ناراض ساتھیوں کو منائیں اور ملک گیر  تنظیم سازی کریں۔

چوہدری شجاعت حسین نے ڈاکٹر امجد کو ہدایت کی ہے کہ ونگز کو متحرک بنایا جاِئے اور بیرون ممالک میں پارٹی کی تنظیم نو کریں۔

ان کا کہنا تھا کہ سیاسی استحکام کے لیے دوسری جماعتوں سے رابطے بہتر بنائیں، اور ملک کی دیگر سیاسی جماعتوں کے بھی آپس میں قریبی روابط ہونے چاہیں۔

سربراہ مسلم لیگ ق نے کہا کہ روابط سے سیاسی استحکام میں مدد ملے گی، سیاسی ڈائیلاگ ہی ملکی مسائل کا حل ہے، پائیدار معاشی ترقی سیاسی استحکام سے وابستہ ہے۔

مسلم لیگ ق کے مرکزی ترجمان مصطفیٰ ملک نے کہا کہ سیاسی جماعتیں استحکام کے لیے اپنا کردار ادا کریں۔

ڈاکٹر محمد امجد کا کہنا تھا کہ چیف آرگنائزر تقرری اور چوہدری شجاعت حسین کا اعتماد میرے لئے اعزاز ہے، انہوں نے کہا کہ چوہدری شافع حسین اور چوہدری سالک حسین کا بھی شکرگزار ہوں۔

ڈاکٹر محمد امجد نے مزید کہا کہ کوشش ہے میں چوہدری شجاعت حسین کے اعتماد پر پورا اتروں، چوہدری شجاعت حسین کے نظریہ اور رواداری کے پیغام کو ہر پاکستانی تک پہنچانا ہے۔