وزیراعلیٰ سندھ سید مراد علی شاہ نے این ای ڈی یونیورسٹی کے 33 ویں کانوکیشن کی تقریب سے خطاب کیا۔

وزیر اعلیٰ سندھ نے اپنے خطاب میں کہا کہ این ای ڈی  یونیورسٹی کا  جدید تعلیم کے فروغ اور جدت میں  بڑا مثالی کردار ہے، این ای ڈی یونیورسٹی پاکستان کی بہترین یونیورسٹیوں میں سے ہے۔

این ای ڈی کے فارغ التحصیل طلبہ ملک کے لیے بہت بڑا سرمایہ ہیں، این ای ڈی یونیورسٹی جدید دور کے تقاضوں کے  مطابق طلباء کو عملی میدان کے لیے تیار کرتی ہے، این ای ڈی یونیورسٹی کے طلبہ عالمی سطح پر کامیابی کے ساتھ مختلف شعبوں میں اپنے فرائض انجام دے رہے ہیں۔

انہوں نے کہا کہ این ای  ڈی جدید ٹیکنالوجی کے میدان میں  بہت سے شعبوں میں اپنی خدمات پیش کررہی ہے، 2022-21 میں این ای ڈی یونیورسٹی نے اپنا صد سالہ جشن منایا۔

پاکستان کے ترقیاتی اسٹرکچر میں این ای ڈی کے طلبہ کا بڑا نمایاں کردارہے، سندھ حکومت اور انر ٹیک کا این ای ڈی یونیورسٹی کے سائنس اینڈ ٹیکنالوجی پارک کے قیام میں مکمل تعاون رہا۔

وزیر اعلیٰ نے کہا کہ اس سہولت کا مقصد طلباء، فیکلٹی اور صنعتی اسٹیک ہولڈرز کے درمیان تعاون کو بڑھانا ہے،  صوبے میں معاشی ترقی کو سہل اور بہتر بنانا ہے۔

ہم نے اعلیٰ تعلیمی اداروں کے فنڈز کو 6 ارب  روپے سے بڑھا کر 33 ارب روپے کر دیا ہے، یہ اقدام تعلیم کے فروغ میں ہمارے عزم کا ثبوت ہے، ہم نے پیپلز آئی ٹی پروگرام کا بھی انعقاد کیا جو کہ جدید آئی ٹی ٹریننگ  سے آراستہ ہے۔

گوگل کے ساتھ تعاون سے طلباء کو جدید ڈیجیٹل ٹولز سے متعارف کرایا جائے گا تاکہ انفارمیشن ٹیکنالوجی  کے میدان میں جو بھی نئی تبدیلی آئے طلبہ  اُسے آسانی سے  سمجھ سکیں۔

ان کا کہنا تھا کہ 2022 کا سیلاب ہمارے لیے سب سے بڑا چیلنج رہا جس نے صوبے بھر میں تباہی مچائی، متاثرہ  افراد کے لیے گھروں کی تعمیر کا عمل جاری ہے اور اس میں ہم کافی حد تک کامیاب ہوئے ہیں، سیلاب کی تباہ کاریوں  سے نمنٹنے کے لیے ٹیکنالوجی  کی افادیت سے انکار ممکن نہیں۔

وزیر اعلیٰ سندھ کا کہنا تھا کہ آپ تمام طلبہ قابل احترام ہیں  اور انسانی خیر کے اس کام میں اپنا حصہ ضرور ملائیں، امید کرتا ہوں کہ این ای ڈی کے گریجویٹس اس اہم کام میں اپنا کردار ضرور ادا کریں گے۔

انہوں نے کہا کہ جدید ٹیکنالوجی کے استعمال سے بہت سےدرپیش چیلنجز پر قابو پایا جاسکتا ہے، مجھے یقین ہے کہ یہاں موجود قابل احترام اساتذہ و طلبہ ماحولیاتی تبدیلی  کے چیلنجز سے نمنٹنے میں اپنا  مثبت کردار ادا کریں۔

 وزیر اعلیٰ سندھ مراد علی شاہ نے مزید کہا کہ میں تمام کامیاب طلبہ کو مبارکباد پیش کرتا اور آپ کے شاندار مستقبل کے لیے دعا گو ہوں۔