چیئرمین پی ٹی اے میجر جنرل (ر) حفیظ الرحمان کا کہنا ہے کہ سماجی رابطے کی ویب سائٹ ’ایکس‘ کی بندش کا فیصلہ وفاقی حکومت کا ہے۔

چیئرمین پی ٹی اے میجر جنرل (ر) حفیظ الرحمان نے صحافیوں سے گفتگو کرتے ہوئے کہا کہ ایکس کی بندش کا فیصلہ وفاقی حکومت کا ہے، حکومت جب کہے گی ایکس کھول دیں گے۔

انہوں نے کہا کہ ہماری ایکس سے شکایات کی شرح بہت زیادہ ہے، ایکس کا معاملہ سندھ ہائیکورٹ میں زیر سماعت ہے۔

چیئرمین پی ٹی اے نے کہا کہ 2023 میں بھارت میں 116 مرتبہ انٹرنیٹ بند ہوا جبکہ پاکستان میں 7 مرتبہ انٹرنیٹ بند ہوا۔

ان کا کہنا تھا کہ انٹرنیٹ کی بندش کا دفاع نہیں کرتا لیکن قومی سلامتی ترجیح ہے، اس مرتبہ 10 محرم کو موبائل فون سروس کم بند ہوئی، صرف مخصوص وقت میں مخصوص علاقوں میں انٹرنیٹ سروس بند ہوئی۔

انہوں نے کہا کہ بنگلادیش میں انتخابات کے دوران موبائل فون سروس بند ہوئی، سیکیورٹی حالات کے باعث پنجگور میں موبائل ڈیٹا بند ہے۔

پی ٹی اے کے چیئرمین نے کہا کہ غیر قانونی مواد کو بند کرنے کیلئے اے آئی کا استعمال کریں، ایکس شکایات کو ختم کرے تو ایکس کھول دیں گے، ہمیں کوئی براہ راست خط نہیں لکھتا۔

انہوں نے کہا کہ ایف بی آر کے احکامات پر سمز کی بندش کی مخالفت کی ہے، کوئی شک نہیں کہ جی ایس ایم کی سروس خراب ہے۔

ان کا کہنا تھا کہ پاکستان میں ایک لاکھ 60 ہزار کلو میٹر فائبر ہے جبکہ بھارت نے 35 لاکھ کلو میٹر فائبر بچھائی ہے۔

چیئرمین پی ٹی اے کا کہنا تھا کہ اپریل میں 5 جی کی نیلامی کی جائے گی 25 اپریل کو نیلامی ہو جائے گی۔

ان کا کہنا تھا کہ 5 جی اسپیکٹرم پر 4 جی سروس کا معیار بھی بہتر ہو گا، پی ٹی اے کے پاس انٹرنیٹ کو سلو کرنے کی صلاحیت نہیں ہے۔

چیئرمین پی ٹی اے میجر جنرل (ر) حفیظ الرحمان نے صحافیوں کو بتایا کہ اکتوبر کے آخر تک سلو انٹرنیٹ کا مسئلہ ختم ہو جائے گا۔