مولانا فضل الرحمان کا کہنا ہے کہ پی ٹی آئی سے اپیل کی تھی احتجاج ایس سی اوختم ہونےتک مؤخرکیاجائے، امید ہے ہماری اپیل کی قدرکی جائےگی۔

ٹنڈوالہ یارمیں میڈیا سے گفتگو کرتے ہوئے جے یو آئی ف کے سربراہ مولانا فضل الرحمان نے کہا ہے کہ اب تک شیئرکیےگئےمسودے میں ہم آہنگی ہوچکی ہے، کل کراچی میں بلاول بھٹو پھرلاہورمیں نوازشریف سےملاقات کروں گا۔

مولانا فضل الرحمان نے کہا کہ ملک کے حالات اورضرورت کے تحت قانون سازی ہونی چاہیے، عوام اورملک کے مفاد میں سب کچھ کرنا ہے، پارلیمنٹ کا کام ہی آئین اورقانون میں ترمیم ہے، جوچیزیں وقت کی ضرورت ہیں ہم ان کوترجیح دیں گے۔

سربراہ جے یوآئی ف نے کہا کہ جن چیزوں پراعتراض تھا وہ بہترہوگئی ہیں، حکومت کے مسودے سےعدلیہ عوام کے حقوق تباہ ہوجاتے، ترمیم پراتفاق رائے نہ ہوا تواس کومسترد کریں گے، بڑی کوششوں کے بعد اتفاق رائے کے قریب پہنچ چکے ہیں۔

انھوں نے کہا کہ پی ٹی آئی سے اپیل کی تھی احتجاج ایس سی اوختم ہونےتک مؤخرکیاجائے، امید ہے ہماری اپیل کی قدرکی جائےگی، پہلے بھی احتجاج کیا گیا تھا جس کےنتائج اچھےنہیں آئےتھے، تمام جماعتوں سے ملاقاتیں چلتی رہتی ہیں۔

مولانافضل الرحمان نے کہا کہ ملک کے اندرامن وامان اورجمہوری ماحول ہونا چاہیے، آئینی ترامیم آتی ہیں تواس پراختلاف بھی ہوتا ہے، 18ویں ترمیم پاس کرنےکیلئےہمیں9ماہ لگےتھے، کچھ چیزیں طےکرنےکیلئےمہینوں تک بیٹھنا پڑا۔

سربراہ جے یو آئی ف نے مزید کہا کہ کیا وجہ ہےاس ترمیم کیلئے ایک ماہ بھی دینےکوتیارنہیں، ترمیم پراتفاق نہ ہواتواس کومسترد کریں گے۔