وزیر اعلیٰ خیبر پختونخوا علی امین گنڈاپور نے کہا ہے کہ اسلام آباد دارالخلافہ ہے ہم ہر بار جا سکتے ہیں۔

وزیر اعلیٰ خیبر پختونخوا علی امین خان گنڈاپور نے  پشاور میں  بی آر ٹی کے نئے روٹ کا افتتاح کیا، سیکریٹری ٹرانسپورٹ ، سی ای او ٹرانس پشاور اور دیگر افسران بھی موجود تھے۔

روٹ پر سردار گڑھی تا پبی بازار سروس فراہم کی جائے گی، روٹ کی کل لمبائی سولہ  کلومیٹر ہے۔

افتتاحی تقریب سے خطاب میں علی امین گنڈا پور نے آئینی ترمیم کیخلاف احتجاج کی دھمکی دیتے ہوئے کہا کہ اسلام آباد دارالخلافہ ہے ہم ہر بار جا سکتے ہیں۔

انہوں نے کہا کہ آئینی ترمیم نہیں مانتے یہ آزاد عدلیہ پرحملہ ہے، من پسند لوگوں کولگا کر سسٹم پرقبضہ کیا جاتا ہے، آزاد عدلیہ پرحملہ ہوا، اس کی مذمت کرتے ہیں۔

علی امین گنڈاپور نے کہا کہ اس وقت ملک میں الگ الگ ترامیم کر رہے ہیں جس کا کوئی فائدہ نہیں، سینئرترین جج کو نہیں لایا گیا تو احتجاج کریں گے۔

انہون نے کہا کہ ہم دوبارہ بھی احتجج کریں گے جبر اور فسطائیت کے خلاف کھڑے رہیں گے، اس بار الگ پلاننگ کر رہے ہیں، پورے پاکستان اور آزاد کشمیر سے لوگ آئیں گے، پورے پاکستان کو بلاک کریں گے۔

وزیر اعلیٰ کے پی نے کہا کہ بانی پی ٹی آئی کو رہا نہ کیا گیا تو فائنل کال دیں گے، اب آر یا پار بس دوٹوک بات ہو گی۔

خیبر پختونخوا کے وزیر اعلیٰ علی امین گنڈاپور نے مزید کہا کہ آئین کو توڑ کر اپنی مرضی کریں گے تو ان کا راستہ روکیں گے، ہرحد تک جائیں گےاگر جان بھی دینی پڑی تو دیں گے۔