پاکستان پیپلز پارٹی کے سینئر رہنما اور صوبائی وزیر شرجیل انعام میمن کا کہنا ہے کہ پی ٹی آئی کو بھارت اور اسرائیل سے فنڈنگ ہوئی۔

صوبائی وزیر شرجیل انعام میمن کا کہنا تھا کہ اسرائیلی لابی میں گولڈاسمتھ لابی بہت زیادہ سرگرم ہے، بانی پی ٹی آئی اسرائیلی اور گولڈ اسمتھ لابیز کا استعمال کر رہے ہیں۔

انہوں نے کہا کہ یہ وہی بانی پی ٹی آئی ہیں جو کہتے تھے ہم کوئی غلام تو نہیں، بانی پی ٹی آئی سے جیل میں ملاقات پر پابندی ختم ہوگئی۔

ان کا کہنا ہے کہ یہ تاثر دیا جا رہا ہے کہ بانی پی ٹی آئی ہیرو ہیں، ان پر ظلم ہو رہا ہے۔

صوبائی وزیر کا کہنا ہے کہ لگ رہا ہے کہ بانی پی ٹی آئی کو ریلیف دیا جا رہا ہے، لابنگ کی جا رہی ہے کہ بانی پی ٹی آئی کو ریلیف دیا جائے، سابق بیگم بانی پی ٹی آئی ریلیف کی ماسٹر مائنڈ ہیں۔

اسرائیل فلسطین، لبنان اور ایران پر حملے کر رہا ہے، ڈاکٹر اسرار احمد کی باتیں آج صحیح ثابت ہو رہی ہیں۔

ان کا کہنا تھا کہ فضل الرحمان قابل احترام اور معتبر سیاسی شخصیت ہیں، مولانا فضل الرحمان مذاکرات پر یقین رکھتے ہیں، مولانا فضل الرحمان مذاکرات کے دروازے بند نہیں کرتے۔

سندھ کے صوبائی وزیر شرجیل انعام میمن نے مزید کہا کہ مولانا فضل الرحمان سے بات چیت ہو سکتی ہے، مولانا فضل الرحمان جائز بات پر قائل ہو جاتے ہیں۔