اسلام آباد: 23 ویں شنگھائی تعاون تنظیم سربراہان حکومت کانفرنس کا مشترکہ اعلامیہ جاری کردیا گیا۔

اعلامیے کے مطابق شنگھائی تعاون تنظیم کا 23 واں سربراہان حکومت اجلاس اسلام آباد میں منعقد ہوا جس میں بیلا روس کے وزیر اعظم، بھارتی وزیر خارجہ، ایران کے وزیر صنعت، چین اور قازقستان کے وزیراعظم بھی اجلاس میں شریک ہوئے۔

وزیر اعظم شہباز شریف نے ایس سی او سربراہان حکومت کانفرنس کی صدارت کی جب کہ روس، تاجکستان، ازبکستان کے وزرائے اعظم اور کرغزستان وزرا کابینہ کے چیئرمین نے شرکت کی جب کہ شرکا نے آستانہ میں ہیڈز آف اسٹیٹ اجلاس کے فیصلوں پرعمل درآمد کی اہمیت پر زور دیا۔

محفوظ، پرامن اور خوشحال سرزمین کے لئے تعاون بڑھانے کا عزم

اعلامیے میں کہا گیا ہے کہ ایس سی او ممالک لوگوں کی جمہوری، سیاسی، معاشرتی اور معاشی حلقوں کے استعمال کا احترام کرتے ہیں، شرکا نے محفوظ، پرامن اور خوشحال سرزمین کے لئے تعاون بڑھانے کے عزم کا اعادہ کیا۔

فورم کے شرکا نے ممالک کے تنازعات کا بات چیت اور مذاکرات کے ذریعے حل پرزور دیا اور  تنظیم کی یو این جنرل اسمبلی کی امن ہم آہنگی اور ترقی سے متعلق قرارداد کی حمایت جب کہ تنظیم کارکن ممالک میں سیاست اور سیکیورٹی کے شعبوں میں تعاون بڑھانے پر زور دیا۔

فورم کا تجارت، معیشت، سرمایہ کاری اور ثقافت کے شعبوں میں تعاون بڑھانے، غیرامتیازی اور شفاف تجارتی نظام کے قیام کی ضرورت پر بھی زور دیا جب کہ فورم نے یک طرفہ تجارتی پابندیاں لگائے جانے کی مخالفت کی۔

یک طرفہ پابندیاں ورلڈ ٹریڈ آرگنائزیشن کے قوانین کے خلاف ہیں

مشترکہ اعلامیے میں کہا گیا کہ یک طرفہ پابندیاں ورلڈ ٹریڈ آرگنائزیشن کے قوانین کے خلاف ہیں، رکن ممالک نے ون ارتھ  ون فیملی اور ون فیوچر پر زور دیا۔ پاکستان، کرغزستان، بیلاروس اور قازقستان کی چین کے بیلٹ اینڈ روڈ انی شی ایٹو کی حمایت کی جب کہ روس اور ازبکستان نے بھی چین کے بیلٹ اینڈ روڈ انی شی ایٹو کی حمایت کی۔

فورم نے یورپ اور ایشیا کے درمیان بہتر اقتصادی اشتراک کی ضرورت پر زور دیا، گرین ڈویلپمنٹ، ڈیجیٹل اکانومی، سرمایہ کاری، ٹیکنالوجی کے شعبوں میں استعداد کار بڑھانے پر زور دیا جب کہ رکن ممالک میں جاری سرمایہ کاری منصوبوں کے لئے ڈیٹا بینک بنانے کی تجویز پر بھی زور دیا گیا۔

علاوہ ازیں فورم کا الیکٹرانک تجارت کے اسپیشل ورکنگ گروپ کے مسلسل اجلاس منعقد کرنے پر زور، سربراہان نے قومی صنعتی پالیسی، ڈیجیٹل پلٹ فارمز کے تجربات کے تبادلے کی تجویز کا جائزہ لیا اور سربراہان نے پروڈکشن ٹیکنالوجی، آئی ٹی سلوشن کے اقدامات پر عملدرآمد کے تجربات کی تجویز کا جائزہ لیا۔

کامیاب اجلاس پر پاکستان کو خراج تحسین

اعلامیے میں مزید کہا گیا ہے کہ سربراہان نے ایس سی او سربراہان حکومت کے کامیاب اجلاس پر پاکستان کو خراج تحسین پیش کیا جب کہ ایس سی او اجلاس میں ایس سی او کی معاشی اور تنظیمی سرگرمیوں کا جائزہ لیا گیا جب کہ سربراہان نے انفارمیشن سیکیورٹی کی فیلڈ میں تعاون کی اہمیت پر زور دیا۔

اعلامیہ میں بتایا گیا ہے کہ شرکا نے معاشی ترجیحات، تجارتی تعاون کے فروغ کے لئے اقدامات پر عمل درآمد کی ہدایات کی، اجلاس میں ایس سی او کی معاشی اور تنظیمی سرگرمیوں کے فیصلے کیے گئے، سربراہان نے ملٹی لیٹرل ٹریڈ اور معاشی تعاون سے متعلق رپورٹ کی منظوری دی۔

آئندہ اجلاس 2025 میں روس میں ہوگا

اعلامیے کے مطابق ایس سی او ہیڈز آف گورنمنٹ کا آئندہ اجلاس 2025 میں روس میں ہوگا، وفد کے سربراہان نے تنظیم کی 2024-25 کی چیئر چین کو ملنے کی حمایت کی۔ اعلامیہ میں کہا کہ بین الاقوامی قانون کے اصول، باہمی احترام، قومی مفادات کا خیال رکھتے ہیں۔

یوریشین اکنامک یونین، جنوب مشرقی ایشیائی ایسوسی ایشن و دیگرکے ساتھ پارٹنرشپ کی تجویز نوٹ کی گئی، سربراہان نے پائیدار ترقی کے فریم ورک کے اندر تعاون کو فروغ دینے کی وکالت کی۔ سبز ترقی، ڈیجیٹل معیشت اور تجارت جیسے شعبوں میں خطے کی صلاحیت بہتر بنانا ہوگی۔

سائنس وٹیکنالوجی، ماحولیات اور موسمیاتی تبدیلی میں تعاون بڑھانے پر زور

مشترکہ اعلامیے میں مزید بتایا گیا ہے کہ رکن ممالک پائیدار اور جامع اقتصادی ترقی کو آگے بڑھانے کو اہم سمجھتے ہیں جب کہ ای کامرس، فنانس اور بینکنگ، سرمایہ کاری،اعلیٰ ٹیکنالوجی میں تعاون بڑھانے پر زور دیا گیا ہے۔

اسٹارٹ اپس، غربت کا خاتمہ، صحت، زراعت، صنعتی شعبوں میں تعاون بڑھانے۔۔ ٹرانسپورٹ، لاجسٹکس کنیکٹیویٹی، توانائی اور مواصلات میں تعاون بڑھانے جب کہ سائنس وٹیکنالوجی، ماحولیات اور موسمیاتی تبدیلی میں بھی تعاون بڑھانے پر زور دیا گیا ہے۔