انٹراپارٹی الیکشن کیس میں الیکشن کمیشن آف پاکستان نے پی ٹی آئی کو درخواست گزاروں کی درخواستوں پرجواب جمع کرانے کی ہدایت کردی۔

الیکشن کمیشن آف پاکستان میں ممبرسندھ نثاردرانی کی سربراہی میں چاررکنی کمیشن  نے پی ٹی آئی انٹرا پارٹی الیکشن کیس کی سماعت کی۔  چیئرمین پی ٹی آئی بیرسٹرگوہر، اکبرایس بابر، نوید انجم کمیشن کے سامنے پیش ہوئے۔

ممبرکے پی نے اکبرایس بابرسے استفسار کیا کہ آپ نے بھی انٹرا پارٹی الیکشن کروایا ہے۔ اس پر اکبر ایس بابر نے جواب دیا کہ ہم نے کوئی انٹرا پارٹی الیکشن نہیں کروایا۔

بیرسٹر گوہر نے جواب دیا کہ ہائی کورٹ نے الیکشن کمیشن کو فائنل آرڈرکرنے سے روکا ہے۔

ممبر کے پی نے کہا کہ ہمارے پاس یہ اختیار نہیں کہ ہم آپ کو دوبارہ انٹرا پارٹی الیکشن کروانے کا کہیں۔

کمیشن نے دیگر درخواست گزاروں کو درخواستوں کی نقول پی ٹی آئی کو فراہم کرنے کی ہدایت کردی۔

 بیرسٹر گوہرنے مؤقف اپنایا کہ انٹرا پارٹی الیکشن کے خلاف پانچ درخواستیں دائر کی گئی ہیں۔ اکبر ایس بابرنے مؤقف پیش کیا کہ الیکشن کمیشن اب پانچ سال تک دوبارہ انٹرا پارٹی الیکشن کروانے کی ہدایت نہیں کر سکتا۔

فیصل چوہدری نے کہا کہ ہم ان جھوٹی کہانیوں کا جواب دے دیں گے۔ اس پرممبر کے پی اور بیرسٹر گوہر کے درمیان پشتو میں مکالمہ ہوا۔

فیصل چوہدری نے کہا کہ ہمیں بھی سمجھا دیں کیا بات ہوئی ہے۔

الیکشن کمیشن نے تحریک انصاف کو درخواست گزاروں کی درخواستوں پرجواب جمع کرانے کی ہدایت کردی۔

وکیل نوید انجم نے مؤقف بیان کیا کہ ہمارا کیس کاغذات نامزدگی جمع ہونے سے متعلق ہے۔ اس پر الیکشن کمیشن نے کہا کہ ہم اگلی سماعت پر پہلے آپ کی گذارشات سن لیں گے۔

اس کے ساتھ ہی کیس کی سماعت 14 نومبرتک ملتوی کردی گئی۔