وزیراعلیٰ پنجاب مریم نوازشریف نے ایل ڈی اے سےغیرقانونی ہاؤسنگ اسکیموں کے بارے میں تفصیلات طلب کرلیں۔

اجلاس کے دوران مریم نواز شریف نے غیرقانونی ہاؤسنگ اسکیموں پر پلاٹ فائل بیچنے کی پابندی کی تجویز کا بھی جائزہ لیا اورڈی جی ایل ڈی اے کو 15 دن کے اندر رپورٹ پیش کرنے کی ہدایت کردی۔

وزیراعلٰی پنجاب نے لاہورمیں روڈزکے گڑھے پر کرنے کیلئے ترقیاتی اداروں کوباہمی اشتراک کے ساتھ جامع پلان پیش کرنے کی بھی ہدایت کی۔

وزیراعلیٰ مریم نوازشریف کی زیرصدارت خصوصی اجلاس میں ایل ڈی اے ڈویلپمنٹ اورسی ایم انیشیٹو کا تفصیلی جائزہ لیا گیا اورلاہورشاپ اینڈ ڈراپ ٹرام وے کے بارے میں تفصیلی بریفنگ دی گئی۔

اجلاس میں بریفنگ میں بتایا گیا کہ 8.2کلومیٹر طویل ٹرام کلمہ چوک، مین بلیوارڈ، حسین چوک، ایم ایم عالم روڈ، منی مارکیٹ اوردیگرعلاقوں سے گزرے گی۔ 5ٹرام بیک وقت چلائی جائیں گی، ہرسٹاپ پر ہر دو منٹ کے بعد ٹرام میسر ہوگی۔

اجلاس میں کریم بلاک تا موٹروے خصوصی روڈ کی تعمیر کے پراجیکٹ کے بارے میں بھی بریفنگ دی گئی، داتا نگر فلائی اوور خستگی کے پیش نظر گرانے کی تجویز کا جائزہ لیا گیا۔ ایل ڈی اے روڈ نیٹ ورک ری اسٹرکچرنگ پلان بھی پیش کیا گیا۔

اجلاس میں سینیٹرپرویزرشید، سینئرمنسٹرمریم اورنگزیب، صوبائی وزیراطلاعات و ثقافت عظمیٰ زاہد بخاری، وائس چیئرمین ایل ڈی اے میاں مرغوب احمد، ایم پی اے ثانیہ عاشق، چیف سیکریٹری، پرنسپل سیکریٹری، سیکریٹری ہاؤسنگ، ڈی جی ایل ڈی اوردیگرارکان بھی موجود تھے۔