خوارج نے ضلع لکی مروت میں نماز مغرب کے دوران مسجد پر حملہ کیا، حملے میں کیڈٹ عارف اللہ بہادری سے لڑتے ہوئے شہید ہو گئے۔

پاک فوج کے شعبہ تعلقات عامہ (آئی ایس پی آر) کے مطابق خوارج کے حملے کے خلاف کیڈٹ عارف اللہ نے بہادری سے لڑتے ہوئے مسجد میں موجود کئی نمازیوں کی جانیں بچائیں۔

آئی ایس پی آر کا کہنا تھا کہ مسجد میں نمازیوں پر حملہ کرنے کا بزدلانہ فعل خوارج کے حقیقی نظریے کا عکاس ہے جبکہ کیڈٹ کا بہادرانہ عمل دہشت گردی کی لعنت کو ختم کرنے کیلئے فورسز کے عزم کا ثبوت ہے، ایسی قربانیاں ہمارےعزم کو مزید مضبوط کرتی ہیں۔

کیڈٹ عارف اللہ کی عمر 19 سال آبائی شہر لکی مروت چھٹی پر آئے ہوئے تھے، کیڈٹ عارف اللہ پاکستان ملٹری اکیڈمی کاکول میں زیر تربیت تھے۔

جی سی عارف اللہ شہید نے سوگواران میں والدین، 4 بھائی اور 4 بہنیں چھوڑے ہیں، جی سی عارف اللہ شہید کے بڑے بھائی بھی پاکستان آرمی میں دفاع وطن کا فریضہ سر انجام دے رہے ہیں۔

آئی ایس پی آر کا مزید کہنا تھا کہ جی سی عارف اللہ شہید نے نہتے ہوتے ہوئے بھی فتنتہ الخوارج کے دہشت گردوں کا گتھم گتھا لڑائی میں مقابلہ کیا۔