بانی پاکستان تحریک انصاف کی اہلیہ بشری بی بی کے خلاف ملتان، لیہ، راجن پوراورڈیرہ غازی خان میں مقدمات درج کر لیے گئے ہیں 

ملتان میں عمیرمقصود نامی شہری کی مدعیت میں تھانہ قطب پورمیں مقدمہ درج کیا گیا ہے۔

ایف آئی آر کے متن کے مطابق سوشل میڈیا پر بشری بی بی کی منافرت پھیلانے پرمشتمل ویڈیو دیکھی، ویڈیو میں سابق آرمی چیف اور سعودی عرب پر الزامات عائد کیے گئے ہیں۔

اُدھرلیہ میں تھانہ سٹی میں بانی پی ٹی آئی کی اہلیہ بشری بی بی کیخلاف ٹیلی گراف ایکٹ 1885 کی شق 29 کے تحت درج کیا گیا ہے۔ مقدمہ بشری بی بی کے حالیہ سعودی حکومت کے حوالے سے بیان پردرج کیا گیا۔

مقدمہ محلہ عید گاہ کے رہائشی اشفاق سہیل کی مدعیت میں درج کیا گیا جس میں مدعی نے مؤقف اپنایا کہ نجی ٹی وی پربشری بی بی کا بیان دیکھا و سنا۔ بشری بی بی کا شریعت کے خاتمے کا بیان خارجہ پالیسی کے خلاف اورملک کیخلاف سازش ہے۔

ایف آئی آرکے متن کے مطابق بشری بی بی کا بیان پاکستان اورسعودی عرب کے بیچ اعلی سطحی اموراورباہمی مفادات کے خلاف ہے۔

تھانہ راجن پور اور تھانہ جمال خان ڈیرہ غازی خان میں درج ایف آئی آرمیں کہا گیا کہ بشریٰ بی بی کا بیان پاکستان اورسعودی عرب کی خارجہ پالیسی اور باہمی مفادات کے خلاف ہے، بشریٰ بی بی کے بیان سے پاک سعودی تعلقات بری طرح متاثر ہوئے ہیں۔

شہری کی ایف آئی آرکے متن کے مطابق سعودی عرب نے ہر مشکل گھڑی میں پاکستان کا ساتھ دیا ہے، اس طرح کے متنازع الزامات برادرانہ تعلقات کو ناقابلِ تلافی نقصان پہنچاتے ہیں۔ یہ ایک سوچی سمجھی سازش ہے،  ایسے بیانات امت مسلمہ کے اتحاد کو کمزور کرسکتے ہیں، سعودی عرب نے ہمیشہ پاکستان کی معاشی اورسفارتی مدد کی ہے۔

درج ایف آئی آر میں کہا گیا کہ یہ بیان پاکستان کے خارجی تعلقات کے لیے شدید خطرہ ہے، عوام کا مطالبہ ہے کہ ایسے بیانات دینے والوں کو قانون کے کٹہرے میں لایا جائے، قومی مفاد کے خلاف کسی بھی اقدام کو برداشت نہیں کیا جائے گا، بشریٰ بی بی کے بیان نے پاکستان کی عالمی ساکھ پر سوالیہ نشان کھڑا کردیا ہے، ایسے بیانات قومی اور بین الاقوامی سطح پر پاکستان کو نقصان پہنچا سکتے ہیں۔