سپریم کورٹ نے چیف جسٹس ہائیکورٹس کے اختیارات سے تجاوزکے کیس کی سماعت غیرمعینہ مدت تک ملتوی کر دی۔

جسٹس امین الدین خان کی سربراہی میں چھ رکنی آئینی بنچ نے سپریم کورٹ میں چیف جسٹس ہائیکورٹس کے اختیارات سے تجاوزسے متعلق کیس کی سماعت کی۔

وکیل میاں داؤد نے مؤقف اپنایا کہ سابق چیف جسٹس لاہورہائی کورٹ امیربھٹی نے اپنی ریٹائرمنٹ سے قبل ٹربیونل میں اپنے ملازمین کیخلاف تمام کیسز ختم کردیے، سابق چیف جسٹس لاہورہائیکورٹ کا یہ اقدام اختیارات کا غلط استعمال ہے۔

جسٹس محمد علی مظہرنے وکیل سے کہا کہ یہ بہت اہم بات کی ہے آپ نے، اس کی تفصیل بتائیں۔ وکیل نے عدالت کو بتایا کہ سابق چیف جسٹس لاہورہائی کورٹ نے ریٹائرمنٹ سے پہلے ملازمین کو ایڈوانس انکریمنٹ دیے، وزیراعظم عوامی فنڈزکے غلط استعمال کرے توایکشن ہوتا ہے۔  ہائیکورٹس کے چیف جسٹس صاحبان کو یہ حق نہیں ہے کہ وہ اختیارات سے تجاوزکریں۔

جسٹس جمال خان مندوخیل نے کہا کہ اس آئینی بینچ میں کم ازکم تین ہائی کورٹس کے سابق چیف جسٹس رہ چکے ہیں۔ جسٹس نعیم اختر افغان نے ریمارکس دیے کہ چیف جسٹس صوبائی ہائیکورٹس کے پاس صوابدیدی اختیارات ہیں، ہم نے وہ صوابدیدی اختیارات بہت محتاط اندازمیں استعمال کیے۔

عدالت نے رجسٹرارلاہورہائی کورٹ اورایڈووکیٹ جنرل پنجاب کو نوٹس جاری کرتے ہوئے کیس کی سماعت غیر معینہ مدت تک کیلئے ملتوی کر دی۔