اسلام آباد: وزیراعظم شہبازشریف کی زیرصدارت نیشنل ایکشن پلان ایپکس کمیٹی کے اجلاس میں داخلی سلامتی کو ہر صورت میں یقینی بنانے پر اتفاق کیا گیا ہے۔

ذرائع کے مطابق وزیراعظم شہباز شریف کی زیر صدارت ایپیکس کمیٹی کا اہم اجلاس ہوا جس میں آرمی چیف جنرل عاصم منیر اور چاروں صوبائی وزرائے اعلی شریک تھے۔

علاوہ ازیں اجلاس میں وزیراعظم ازاد کشمیر اور وزیراعلیٰ گلگت بلتستان کے علاوہ متعلقہ وفاقی وزراء بھی ایپیکس کمیٹی اجلاس میں شریک تھے۔

ذرائع کے مطابق اجلاس میں وفاقی اور صوبائی حکام نے امن وامان اور سیکیورٹی اقدامات پر بریفنگ دی جب کہ اجلاس میں داخلی سلامتی کو ہر صورت میں یقینی بنانے پر اتفاق کیا گیا۔

ذرائع کا کہنا ہے کہ فورم نے دہشت گردی سے ہر صورت میں نمٹنے کے عزم کا اعادہ کیا جب کہ وفاقی و صوبائی دارالحکومتوں کی سیکیورٹی صورت حال کا بھی جائزہ لیا گیا۔

ذرائع نے بتایا کہ اجلاس کے دوران فورم نے پاک فوج اوردیگر سیکیورٹی فورسز کے جوانوں اور افسران کو خراج تحسین پیش کرتے ہوئے ان کے لیے دعائے مغفرت اور فاتحہ خوانی کی۔

ذرائع نے مزید بتایا کہ انٹیلی جنس اداروں کے سربراہان نے انسداد دہشت گری کے آپریشنز پر بریفنگ دی جب کہ اجلاس میں ڈیجیٹل دہشت گردی کے خاتمے سمیت انٹیلی جینس بیسڈ آپریشنز کی کامیابیوں پر بریفنگ دی گئی۔

وزیر اعظم کا اظہار خیال

وزیراعظم شہباز شریف نے نیشنل ایکشن پلان کی ایپیکس کمیٹی میں اظہار خیال کرتے ہوئے کہا کہ ملکی معیشت استحکام کی جانب گامزن ہے، معیشت کی بہتری میں کوششوں پر تمام اداروں کے شکر گزار ہیں۔

انہوں نے کہا کہ معاشی بہتری، ترقی اور سیاسی استحکام ایک دوسرے سے منسلک ہیں جب کہ معاشی استحکام اور آئی ایم ایف پروگرام میں تعاون پر صوبوں کا شکریہ ادا کیا۔

ملک میں مہنگائی سنگل ڈیجٹ پر آگئی

وزیر اعظم کا کہنا تھا کہ ملک میں مہنگائی سنگل ڈیجٹ پر آگئی ہے، اسٹاک مارکیٹ تاریخ کی نئی بلندیوں کو چھو رہی ہے جب کہ پالیسی ریٹ 22 فیصد سے کم ہوکر 15 فیصد پر آگیا ہے۔

انہوں نے بتایا کہ آئی ٹی کی برآمدات اور ترسیلات زر میں ریکارڈ اضافہ ہوا، ملک میں بیرونی سرمایہ کاری حکومت کی ترجیح ہے، آئی ایم ایف کا یہ آخری پروگرام ہوگا۔

شہبازشریف کہتے ہیں کہ آئی ایم ایف کے آخری پروگرام کے لیے سب کو محنت اور کوشش کرنا ہوگی، ملکی ترقی کے لیے وفاق اور صوبوں کو مل کر کام کرنا ہوگا، ایف بی آر میں اصلاحات کا عمل جاری ہے۔

وزیراعظم نے مزید بتایا کہ آئی ایم ایف پروگرام کے لیے سعودیہ، یو اے ای اور چین نے تعاون کیا، ملکی ترقی کے لیے ٹیکس آمدن کو بڑھانا اور ٹیکس چوری کو روکنا ہوگا۔ پائیدار ملکی ترقی کے لیے اپنے پاؤں پر کھڑا ہونا ہوگا۔

وزیراعلیٰ پنجاب کو وزیراعظم کا خراج تحسین

وزیراعلیٰ پنجاب کو زرعی اصلاحات پر وزیراعظم نے خراج تحسین پیش کرتے ہوئے کہا کہ مل کر کام کرنے سے ملک ترقی کی منازل طے کرے گا جب کہ ترقی کے منازل طے کرنے کے لیے محنت، دیانت اور لگن سے کام کرنا ہوگا۔

وزیراعظم نے کہا کہ جرمنی اور جاپان نے تباہی کے بعد ایک قوم بن کر ترقی کی منازل طے کیں، 5 آئی پی پیز سے متعلق گفت و شنید کی ہے، صاحب ثروت اور اشرافیہ کو ملک و قوم کے لیے ایثار کا جذبہ دکھانا ہوگا۔

شہباز شریف کا کہنا ہے کہ نواز شریف دور میں قوم اور ملکی قیادت دہشت گردی کے خلاف متحد ہوئی، افواج اور قوم نے دہشت گردی کے خاتمے کے لیے بے شمارقربانیاں دیں، دہشت گردی کے خلاف جنگ میں 80 ہزار جانیں قربان ہوئیں۔

وزیراعظم کا مزید کہنا تھا کہ دہشت گردی سے ملک کو 130 ارب ڈالر کا نقصان پہنچا، ملکی ترقی کے لیے دہشت گردی کا ناسور ختم کرنا ہوگا، بلوچستان اور خیبرپختونخوا میں دہشت گردی کو کچلنا ہوگا، کیا ملک اس وقت دھرنے، جلوس اور لانگ مارچ کا متحمل ہوسکتا ہے؟۔