انسداد دہشت گردی عدالت کے ایڈمن جج منظر علی گل نے نو مئی کے واقعات سے متعلق بانی پاکستان تحریک انصاف (پی ٹی آئی) کی ضمانت کی درخواستیں مسترد کر دی ہیں۔

عدالت نے فریقین کے وکلاء کے دلائل مکمل ہونے کے بعد آج ہی فیصلہ محفوظ کیا تھا۔

اسپیشل پراسیکیوٹر راؤ عبدالجبار نے اپنے دلائل میں کہا کہ تمام مقدمات حساس تنصیبات پر حملوں سے متعلق ہیں اور ملزم بانی پی ٹی آئی کے اشارے پر دو سو سے زائد حساس تنصیبات پر حملے کیے گئے۔ ان واقعات میں ملزم کا مرکزی کردار تھا، جس کے نتیجے میں رینجرز اور پولیس اہلکار شہید ہوئے۔

راؤ عبدالجبار نے مزید کہا کہ چونکہ ملزم وقوعہ کے وقت جیل میں تھا، لہذا ضمانت کی درخواستوں کو مسترد کیا جانا چاہئے۔

بانی پی ٹی آئی کے وکیل، بیرسٹر سلمان صفدر نے دلائل دیتے ہوئے کہا کہ مقدمات کے چالان ابھی تک پیش نہیں کیے گئے ہیں اور عدالت کو اس بات کا اختیار ہے کہ وہ سازش کے حوالے سے تمام معاملات کو ٹرائل کورٹ پر چھوڑ دے۔

انہوں نے مزید کہا کہ ان کی درخواست مقدمات کے خارج یا ڈسچارج کرنے کی نہیں ہے، بلکہ ضمانت کی درخواست کی گئی ہے کیونکہ بانی پی ٹی آئی طویل عرصے سے جیل میں ہیں۔

عدالت نے تمام دلائل سننے کے بعد بانی پی ٹی آئی کی ضمانت کی درخواستیں مسترد کر دیں۔