پاکستان میں ایتھوپیا کے سفیر ڈاکٹر جمال بکر عبداللہ نے وزیر تجارت جام کمال خان سے اہم ملاقات کی، جس میں دونوں ممالک کے درمیان باہمی دلچسپی کے امور پر تبادلہ خیال کیا گیا۔

ملاقات کے دوران 2025 میں ایتھوپیا کے دارالحکومت ادیس ابابا میں پاکستان کی سنگل کنٹری نمائش کرانے پر اتفاق کیا گیا۔

ڈاکٹر جمال بکر عبداللہ نے کہا کہ سنگل کنٹری نمائش دونوں ممالک کے تجارتی تعلقات کو مزید مستحکم کرنے کا ذریعہ بنے گی۔

انہوں نے ایتھوپیا کی “ہوم گرون اکنامک ریفارمز” کا ذکر کرتے ہوئے کہا کہ یہ اصلاحات سرمایہ کاروں کے لیے ایک دوستانہ ماحول فراہم کر رہی ہیں، جو دونوں ممالک کے درمیان تجارتی روابط کو مزید فروغ دیں گی۔

وزیر تجارت جام کمال خان نے اس بات پر زور دیا کہ سنگل کنٹری نمائش ایتھوپیا کے ساتھ تجارتی تعلقات کو وسعت دینے میں اہم کردار ادا کرے گی۔

انہوں نے کہا کہ یہ نمائش پاکستانی تاجروں کو افریقی مارکیٹ میں نئے مواقع فراہم کرے گی اور افریقہ کی 1.4 ارب کی مارکیٹ پاکستانی برآمدات کے لیے بے شمار امکانات پیش کرے گی۔

وزیر تجارت نے بتایا کہ نمائش سے قبل دونوں ممالک کے کاروباری طبقے کے لیے پاکستان میں سیمینارز بھی منعقد کیے جائیں گے۔ وزارت تجارت اور ٹی ڈی اے پی اس نمائش کے کامیاب انعقاد کے لیے بھرپور تیاریاں کر رہی ہیں۔

جام کمال خان نے مزید کہا کہ پاکستان کی “لُک افریقہ پالیسی” کے تحت ایتھوپیا کے ساتھ تجارتی تعاون بڑھانا پاکستان کے لیے بہت اہم ہے اور یہ نمائش افریقہ میں پاکستان کے تجارتی مقام کو مضبوط کرے گی۔