سپریم کورٹ نے مختلف اہم مقدمات کی سماعت کے لیے آئینی بینچ تشکیل دیتے ہوئے سماعت کی تاریخوں کا اعلان کر دیا ہے۔

سپریم کورٹ نے آڈیو لیکس کمیشن کیخلاف دائر درخواستوں کی سماعت کے لیے دو دسمبر کو چھ رکنی آئینی بنچ تشکیل دے دیا ہے، جس کی سربراہی جسٹس امین الدین خان کریں گے۔

گزشتہ سماعت میں عدالت نے اٹارنی جنرل کو حکم دیا تھا کہ وہ حکومت سے آڈیو لیکس کمیشن کے بارے میں ہدایات حاصل کریں اور عدالت کو آگاہ کریں کہ حکومت نیا کمیشن بنانا چاہتی ہے یا نہیں۔

اس کے علاوہ، سپریم کورٹ نے آئی پی پیز کے ساتھ ہونے والے معاہدوں کیخلاف دائر درخواستوں کی سماعت بھی دو دسمبر کو مقرر کر دی ہے۔ درخواستوں پر رجسٹرار آفس نے اعتراضات عائد کر رکھے ہیں، جن کے خلاف درخواست گزاروں نے اپیلیں دائر کر رکھی ہیں۔

علاوہ ازیں، سپریم کورٹ نے پاکستان کے مختلف بینکوں سے 54 ارب روپے کے قرضے معاف کرانے کے خلاف کیس اور پاکستانیوں کے بیرون ملک اثاثوں و بینک اکاؤنٹس کے بارے میں کیس بھی سماعت کے لئے مقرر کر دیے ہیں۔

یہ مقدمات تین دسمبر کو جسٹس امین الدین خان کی سربراہی میں چھ رکنی آئینی بنچ کے سامنے آئیں گے، جس میں وفاقی حکومت سمیت تمام فریقین کو نوٹس جاری کر دیے گئے ہیں۔

لاپتہ افراد کے کیس کی سماعت بھی تین دسمبر کو مقرر کی گئی ہے، جس میں سیاسی کارکنوں کی بازیابی کے لیے دائر اعتزاز احسن کی درخواست بھی شامل ہے۔ عدالت نے اس حوالے سے وفاقی حکومت اور متعلقہ حکام کو نوٹس جاری کر دیے ہیں۔