روس نے بین الاقوامی پابندیوں کو ہوا میں اڑا دیا اور شمالی کوریا کو تیل کی فراہمی جاری رکھی ہوئی ہے جس کی سیٹلائٹ تصاویر بھی سامنے آ گئی ہے۔

برطانیہ میں قائم ایک غیر منافع بخش تحقیقی گروپ اوپن سورس سینٹر کی سیٹلائٹ تصاویر کے تجزیے کے مطابق روس نے اس سال مارچ سے اب تک شمالی کوریا کو دس لاکھ بیرل سے زیادہ تیل فراہم کیا ہے۔

معروف ماہرین اور برطانوی وزیر خارجہ ڈیوڈ لیمی نے برطانوی خبر رساں ادارے کو بتایا ہے کہ پیانگ یانگ نے ماسکو کو یوکرین میں جنگ کو ہوا دینے کے لیے جو ہتھیار اور فوجی بھیجے ہیں ان کے لیے تیل کی ادائیگی کی جا رہی ہے۔

یہ منتقلیاں اقوام متحدہ کی پابندیوں کی خلاف ورزی کرتی ہیں، جو ممالک پر شمالی کوریا کو تیل فروخت کرنے پر پابندی عائد کرتی ہیں، سوائے چھوٹی مقدار کے، تاکہ اس کی معیشت کو دبایا جا سکے اور اسے مزید جوہری ہتھیار تیار کرنے سے روکا جا سکے۔

برطانوی خبر رساں ادارے کے ساتھ خصوصی طور پر شیئر کی جانے والی سیٹلائٹ تصاویر میں دیکھا جا سکتا ہے کہ شمالی کوریا کے ایک درجن سے زائد مختلف آئل ٹینکر گزشتہ آٹھ ماہ کے دوران روس کے مشرق بعید میں تیل کے ایک ٹرمینل پر مجموعی طور پر 43 مرتبہ پہنچے۔

سمندر میں جہازوں کی لی گئی مزید تصاویر میں دیکھا جا سکتا ہے کہ ٹینکر خالی پہنچ رہے ہیں۔۔

شمالی کوریا دنیا کا واحد ملک ہے جسے اوپن مارکیٹ میں تیل خریدنے کی اجازت نہیں ہے۔ ریفائنڈ پیٹرولیم کے بیرل کی تعداد اقوام متحدہ کی جانب سے سالانہ 5 لاکھ تک محدود ہے، جو اس کی ضرورت سے بہت کم ہے۔