وزیراعلیٰ پنجاب مریم نوازشریف نے خواتین کے خلاف تشدد کے خاتمہ کے عالمی دن پر پیغام میں کہا ہے کہ خواتین میری ریڈ لائن ہیں تشدد یا ظلم قطعاً برداشت نہیں، ماؤں، بہنوں، بیٹیوں کی عزت معاشرتی روایات اورمذہبی اقدارہیں۔ 

مریم نواز نے کہا کہ دین اسلام میں پہلی مرتبہ عورت کو مکمل عزت و احترام اور حقوق دینے کے احکامات دئیے گئے۔ بیٹیوں اوربہنوں سمیت خواتین کی عزت و احترام نبی کریم کی سنت ہے۔ قرآن وسنت میں عورت پر ہاتھ اٹھانے سے نہ صرف منع کیا گیا بلکہ نرمی برتنے کا بھی حکم دیا گیا۔

وزیراعلٰی پنجاب نے کہا کہ خواتین پرتشدد کرنے والے بزدل اورمجرم ہیں، آہنی ہاتھوں سے نمٹا جائے گا۔ خواتین کا تحفظ حکومت پنجاب کی اولین ترجیح ہے۔ پنجاب کو پہلی بارورچوئل وویمن پولیس اسٹیشن قائم کرنے کا اعزاز حاصل ہے۔

مریم نواز شریف نے کہا کہ مشکل کا شکارخواتین شکایات ورچوئل پولیس اسٹیشن درج کرا سکتی ہیں، خواتین کسی ہنگامی صورتحال میں پینک بٹن سے فوری پولیس ہیلپ حاصل کرسکتی ہیں، خواتین کے لیے پولیس وویمن ہیلپ لائن بھی مکمل فعال ہے۔

انھوں نے اپنے پیغام میں مذید کہا کہ حکومت پنجاب خواتین کے تحفظ اور حقوق کی پاسداری کے لیے پرعزم ہے، خواتین کے لئےتشدد سے پاک، محفوظ اورمساوی معاشرہ ترقی کی ضمانت ہے۔